इच्छाशक्तिं बने जूगु देश ब्राजिल

वास्तवय् मनूतय्सं याये चाहे जुल धाःसा याये मफइगु छुं नं मदु। मनुखं चाहे जुल धाःसा न्ह्यागु नं यायेफु धइगु खँया नमूना ब्राजिलय् वंगु वालय् तिनि पद त्वःतादीम्ह पुलांम्ह राष्ट्रपति सिल्भा डी' लुलां बांलाक हे क्यना बिल। लुलां ब्वना तःगु आधारय्, सयेका तःगु आधारय् वा सुनां धाःगु आधारय् मखु, थःके दुगु इच्छाशक्तिया आधारय् ब्राजिलया विकास यानाः क्यंगु खः। लुलां शासन ल्हातय् काःगु इलय् तक विश्वया गरीब मध्ये छगू देश धकाः म्हसिउगु ब्राजिलयात वय्कलं थम्हं शासन काःगु च्यादँया दुने विश्वया धनी देश मध्ये छगू दयेकाः क्यना बिल। वय्कः वये न्ह्यः ब्राजिल कंगाल मखुसां कंगाल जुइगुपाखे न्ह्याये धुंकूगु देश खः। भ्रष्टाचार व बेरोजगारं ब्राजिलयात जिक्व हे अराजक दयेकेधुंकूगु खः। तर वय्कलं शासन न्ह्याके सातकि पुलांगु सम्पूर्ण नीतियात त्वाःथलाः पूरा देशया कायापलट याना बिल। वय्कः थम्हं नं स्वीकार यानादीगु दु, थ्व वय्कःया इच्छाशक्तिया लिच्वः खः। वय्कः धाथें ब्राजिल दयेकां त्वःते धइगु उद्देश्य ज्वनाः सत्ताय् वःगु खः। धाथें दयेकां त्वःता बिल। वास्तवय् वय्कःयात अवसर जक मदयाच्वंगु खः। अवसर वयेवं वय्कलं उकियात पुष्टि यानाः क्यना बिल ।

वास्तवय् थ्व वय्कःया इच्छाशक्तिया हे कमाल खः। थज्याःगु हे इच्छाशक्ति विश्वया मेमेगु नं छुं गरीब देय्या शासकतय्सं काःगु खः अले थःगु देशयात दयेकाः क्यना नं बिउगु खः। वास्तवय् मुलुक दयेकेगु खःसा स्रोत साधन जक दयां मगाः। मुख्य माःगु इच्छाशक्ति खः। इच्छाशक्ति दत धाःसा स्रोत हे मदुसां नं देश बने जुइफु धइगु दसु इजरायल झीगु न्ह्यःने दु ।

More Stories Like this