मथुरायात गंकि धूस्वां सिरपाः

उदेन न्हूसायमि

थुगुसीया गंकि धूस्वां बसुन्धरा सिरपाः नेपालभाषाया नांजाःम्ह उपन्यासकार मथुरा सायमियात बीगु जूगु दु। प्रत्येक निदँय् छक्वः नेपालभाषा, खस नेपाली व जनजातिया भायया उपन्यासकारयात बीगु थुगु सिरपाः थुगुसी नेपालभाषायात बीगु पाः जूगुलिं वयक:यात बीगु निर्णय जूगु खः।

गंकि धूस्वां बसुन्धरा प्रतिष्ठानया नकतिनि च्वंगु मुँज्यां वयक:यात थुगु सिरपाःया लिसें उपन्यास सम्राट धूस्वां सायमिया नामं नीस्वनातःगु धूस्वां सायमि सिर्जना पुरस्कार वरिष्ठ गायक व संगीतकार प्रेमध्वज प्रधानयात बीगु निर्णय नं याःगु दु।

थःगु साहित्यिक यात्रा बाखंपाखें न्ह्याकादीम्ह पन्यासकार मथुरा सायमिं थनिं स्वीस्वदँ न्ह्यः न्हापांगु उपन्यास 'कतांमरि' पिथनादीगु खः। अंग्रेजी साहित्यय एम.ए. यानादीम्ह वयकलं लिपांगु इलय् 'माकुगु विष' लघु उपन्यास पिथनादीगु खः। पेशागत रुपं प्राध्यापनय् सक्रिय उपन्यासकार सायमिं थ्व बाहेकं बाखं, चिनाखं व छधाः प्याखनय् नं थःगु च्वसा न्ह्याकादीगु दु।

अथे हे उपन्यास सम्राट धूस्वां सायमिया नामं नीस्वनातःगु 'धूस्वां सायमि सिर्जना पुरस्कार' थुगुसी वरिष्ठ गायक/संगीतकार प्रेमध्वज प्रधानयात बीगु जूगु दु। वयकलं खस व नेपालभाषा निगुलिं संगीत ख्यलय् तःदँ न्ह्यःनिसें बिया वयाच्वनादीगु योगदानया कदर यासें वयक:यात थुगु पुरस्कार बीगु निर्णय याःगु खः।

निम्हं स्रष्टातसें वयक:पिंसं खस व नेपालभाषाया ख्यलय् थौं तक याना वयाच्वनादीगु योगदान, सिर्जनशीलता व निरन्तरताया मूल्यांकन यासें सर्वसम्मतिं थुगु सिरपाः बीगु निर्णय याःगु खः।

प्रतिष्ठानया दुजःपिं कलाकार हरिप्रसाद वैद्यया संयोजकत्वय् कवयित्री प्रतिसरा सायमि, बाखंच्वमि अनिता तुलाधर व कवि नविन चित्रकार दुजः जुयादीगु निर्णायक समितिं थ्व निर्णय याःगु खः।

हना-पौया लिसें नीद्वः तकाया निगुलिं पुरस्कार थ्व हे वइगु माघ १ गते शनिवाः कुन्हु छगू विशेष ज्याझ्वःया दथुइ लःल्हाइगु जूगु दु।

More Stories Like this