अनमिन लित छ्वयेत मानव अधिकारवादी व द्वन्द्वविद्तय्गु सुझाव

येँ (झीगु स्वनिगः)

मानवअधिकारवादी व द्वन्द्वविद्तय्सं शान्तिप्रक्रियां पूर्णता मदुतले नेपाःपाखें अनमिनयात लित छ्वयेमज्यूगु धाःगु दु । सरकारं अनमिनया ई तनेगु धयाच्वंबलय् मानवअधिकारवादी व द्वन्द्वविद्तय्सं अनमिनया ई तनेत सुझाव ब्यूगु दु । जनसन्चार अभियानं विहीवाः येँ याःगु साक्षात्कारय् राष्ट्रिय मानवअधिकार आयोगया दुजः डा. केबी रोकायां संविधान निर्माण व शान्तिप्रक्रियां पूर्णता मदयेवं अनमिनयात लित छ्वयेबलय् देशय् ल्वापु जुइफूगु ख्याच्वः बियादिल ।

अनमिनयात नेपाःपाखें बिदा याःसा शान्तिप्रक्रियाय् आःतक्क जूगु प्रगति ध्वस्त जुइगु धासें वय्कलं च्यूताः प्वंकादिल । शान्तिप्रक्रिया तार्किक निष्कर्षय् मथ्यंतले नेपालय् अनमिनया ब्वति अनिबार्य जूगु डा. रोकायाया धापू खः । ज्याझ्वलय् द्वन्द्व विश्लेषक डा. विष्णुराज उप्रेतीं अनमिनयात नेपाःपाखें लिछ्वयाः भारतं म्हितेत स्वःगु धयादिल । भारतया स्वार्थय् न्ह्याःगु दलतय्सं अनमिनयात ख्यायेत स्वःगु धासें वय्कलं अनमिन लिहांवनेधुंकाः उकियापाखें वइगु खतराया विश्लेषण यायेत सत्तारुढ दलत असक्षम जूगु धयादिल । न्हापाया सहमति पालना यायेत सम्बन्धीत पक्षं च्यूताः मक्यंगु कारण नेपाःया शान्तिप्रक्रिया जटिल मोडय् थ्यंगु वय्कलं बिचाः प्वंकादिल । उगु हे ज्याझ्वलय् मिसा नेतृ शान्ता श्रेष्ठं शान्तिप्रक्रियायात अथें त्वःताः अनमिन लिछ्वयाः सत्तारुढ दलतय्सं देशय् युद्ध हयेत स्वःगु धयादिल ।