व्यावसायिक स्वांपाखे आकषिर्त मिसात

दोलखा (झीगु स्वनिगः)

दोलखाया सदरमुकाम चरिकोटया मिसातय्गु छगू पुचलं व्यावसायिकरूपं स्वां खेती न्ह्याकूगु दु । चरिकोट जःखःया न्हय्म्ह मिसातय्गु पुचलं करुणामय पुष्प नर्सरीया पलिस्था यानाः थुकिया व्यावसायिक खेती न्ह्याकूगु खः । तःदँनिसें थःगु करेसाबारीयात क्यबया रूपं विकास यानाः वयाच्वंम्ह शान्ताकुमारी ठकुरीया न्ह्यलुवाय् मिसात स्वांखेतीइ न्ह्यज्याःगु खः । जिल्लाय् माग जुइगु स्वांया आपूर्ति पूवंकेगु व पुष्प व्यवसायलय् आबद्ध याकाः मिसातय्गु जीविकोपार्जनय् ग्वाहालि यायेगु उद्देश्यं स्वां नर्सरीया पलिस्था याःगु नर्सरीया नकिं ठकुरीं धयादिल । चरिकोटस्थित लम्पतेय् दच्छिया स्वीच्याद्वः तका धेबां झिंगुंगू जग्गा बालं कयाः मिसातय्सं थ्व व्यवसाय न्ह्याकूगु खः । मिसातय्गु थ्व कुतलय् मेपिं स्वम्ह मिजं दुजःतय्सं नं शेयर दुजःयारुपं ब्वति कयाः ग्वाहालि यानाः वयाच्वंगु दु । समूहया दाँभरि दुर्गा श्रेष्ठं नर्सरी पलिस्थाय् न्यागू त्या लाख खर्च जूगु व लगानी अप्वयेकाः झिंन्यागू लाख तका थ्यंकेगु लक्ष्य दुगु धयादिल ।

नर्सरी पलिस्थाया नितिं लघु उद्यम विकास, दोलखां खुम्ह मिसा दुजःया नामय् न्यय्द्वः तका धेबा ग्वाहालि उपलब्ध याःगु खः । स्वां व्यवसाय यायेगु नितिं येँनिसें वःपिं प्रशिक्षकतय्सं मिसातय्त माःगु तालिम ब्यूगु खः । 'स्वां व्यवसाय यायेत उलि थाकू मजुल' - समूहया दुजः स्वस्थानी चौलागाईं धयादिल - 'थ्व ला फुक्क मिसातय्सं यायेफइगु जुयाच्वन ।' वंगु दँ माघनिसें मिसातय्सं न्ह्याकूगु स्वांया नर्सरीइ आः करिब ख्वीगू जातया स्वांया पुसा दुगु नकिं ठकुरीं जानकारी बियादिल । आपालं जातया पुसा व ढकमक्क ह्वयाच्वंगु स्वांया कारण थ्व नर्सरी थःहे छगू नमूना जूगु दु । संस्थाय् आबद्ध दुजःतय्सं नर्सरीइ उत्पादन जूगु स्वांया पुसा व स्वां मियाः छुं आर्थिक लाभ नापं काःगु दु । थनं उत्पादित पुसा व स्वां स्थानीय बजारय् हे खपत जुइगु यानाच्वंगु दु । देशय् आपालं मिसा बेरोजगारया शिकार जुयाच्वंगु अवस्थाय् दोलखाया थुपिं मिसातय्सं न्ह्याकूगु ब्यागलं लिसे आकर्षक पुष्प व्यवसाययात नमूनाकथं कयातःगु दु ।

More Stories Like this