चट्टानया प्रचार याःसा पर्यटक अप्वइगु

येँ (झीगु स्वनिगः)

नेपालय् प्राकृतिकरुपं हे दयाच्वंगु चट्टानया पर्याप्त मात्राय् प्रचार प्रसार यायेफूसा चट्टान गयेगु नितिं नं पर्यटक दुहाँवइगु सम्भावना आपालं दु । पर्यटन दँ सन् २०११ यात लक्षित याना नेपाल सरकारं थुकिया पर्याप्त मात्राय् प्रचारप्रसार यायेगु खःकि धकाः साहसिक कासा चट्टान गयेगु नितिं पर्यटक नेपालय् दुहाँवयेफूगु पर्यटन व्यवसायीतय्सं जानकारी ब्यूगु दु । उमिगुकथं नेपालय् थज्याःगु चट्टानत दु गुगु विश्वया अजूचायापूगु चट्टान मध्येया हे छगू खः, उगु चट्टानयात छ्यलाः पर्यटक आकर्षण यायेफु । चट्टान गइपिनिगु पथप्रदर्शक -गाइड) इन्द्र राईं नेपालय् तःधंगु चट्टानत दुगु व पर्वतारोहण यायेमास्ते वःपिनिगु नितिं चट्टान गयेगु अभ्यास अनिवार्य दुगुलिं पर्वतारोहण यायेगु सोख दुपिं पर्यटकया नितिं झन् आकर्षण जुइगु धयादिल । साधारण मनुखं नं चट्टान गयेफु, थुकिया नितिं थःके साहस दयेमाः धासें राईं विदेशी मिसा थुखेपाखे आकषिर्त जुयाच्वंगु दु धयादिल । थःत साहसिकरुपं थनेत नापं चट्टान गइपिनिगु ल्याखय् वृद्धि जुयाच्वंगु दु । मिसा जुइमा वा मिजं न्ह्याम्हसिनं नं गयेफइगु चट्टान नेपालय् दुगुलिं थुकियात प्रबर्द्धन यायेत नेपाल सरकार न्ह्यःज्यायेमाःगु बिचाः तयादी नेपाल पर्वतारोहण सङ्घया प्रेम गुरुङ ।

पर्वतारोहण याइपिनिगु पथप्रदर्शकयारुपं ज्या यायेमास्ते वःपिंसं नं न्हापां चट्टान गइपिनिगु अनुभव कायेगु आवश्यक जुइ गुरुङं धयादिल । आः चट्टान गयेगु नितिं वइपिं मनूत अप्वः धइथे पथप्रदर्शकयारुपं ज्या यायेमास्ते वःपिं दु । चट्टान गइपिं अप्वः धइथे जनजातिया सक्रियता दु । थुपिं हे अप्वः यानाः पर्वतारोहण यायेत वनीपिनिगु नितिं गाइड जुइगु जूगुलिं उमित थुकिया अभ्यास नापं आवश्यक दुगु गुरुङया धापू दु । चट्टान गइपिनिगु थीथी तहत दु । आधारभूत कोर्ष करिब स्वलाया जुइसा विशेष कोर्ष करिब खुलाया जुइगु यानाच्वंगु दु । आधारभूत कोर्षय् चट्टान गयेबलय् छ्यलेमाःगु सावधानी व थुकिया उपादेय्ताबारे जानकारी बिइसा विशेष कोर्षय् थुकिया अभ्यास आपालं बिइगु याइ । पर्यटक न्हूगु थासय् वनाः न्हूगु अनुभव कायेत चाहे जुइ उकिं पर्यटकया नितिं चट्टान गयेत मेगु नौलो आकर्षण जुइफु वय्कलं धयादी - पर्यटन व्यवसायी सुदर्शन श्रेष्ठ । वय्कःयाकथं पर्वतारोहण यायेमफूपिं तर साहसिक ज्या यायेमास्तेवःपिनिगु नितिं चट्टान गयेत तःधंगु विकल्पयारुपं जुइफु थुकिया नितिं सरकारं प्रचार प्रसार यानाः माःगु सामग्री उपलब्ध यायेमाः ।

सरकारं पर्यटन दँ सन् २०११ यात ताःलाकेगु खःसा चट्टान गयेत पर्यटकया नितिं बांलाःगु गन्तव्य जुइफूगु धयादिसें श्रेष्ठं पर्यटकया बसाइ ताःहाकयेकेत व मनोरञ्जन बिइत चट्टान गयेगु नितिं अप्वः फोकस यायेमाःगु धयादिल । नेपालय् प्राकृतिकरुपं रानीवन, ककनी, पोखरा, मुस्ताङ, मनाङ लगायतया थासय् ततःधंगु प्राकृतिक चट्टान दुसा थीथी थासय् पर्वतारोहण सङ्घं कृत्रिम चट्टान नापं दयेकूगु दु ।
पर्वतारोहण यायेमास्ते वःपिं पर्यटकं आधारभूत कोर्षया नितिं झिद्वः व विशेष कोर्षया नितिं झिंच्याद्वः तका धेबा पुलेमाःगु प्रावधान दुगु नेपाल पर्वतारोहण सङ्घं जानकारी ब्यूगु दु । सरकारं थुकियात खेलकुदयारुपं विकास यायेत नं धयाः वयाच्वंगु राईं चट्टान गइपिंत व्यवस्थित यायेत कुतः यायेगु खःसा थुकिं पर्यटक प्रबर्द्धनय् तसकं तःधंगु भूमिका म्हितीगु बिचाः तयादिल ।

More Stories Like this