यलया देशय् मरु झ्याः

नेवाःतय्सं येँय् न्यत लागाय् देशय् मरु झ्याः दु धकाः यक्व हे नेवाःतय्सं सिउ तर यलय् नं देशय् मरु झ्याः दु धैगु खँ यलय् च्वंपिन्सं हे अप्वःसिनं मसिउ । यलय् च्वंपिं मनूतय्सं यलया मौलिक झ्याः धकाः नकिं झ्याःयात नालाच्वंगु दु । नकिं झ्याः यक्व हे यलय् च्वंपिन्सं सिउ तर यलया देशय् मरु झ्याः धाःसा म्हो जक मनूतय्सं सिउ । यलया नं शाक्य व बज्राचार्यतय्सं देशय् मरु झ्याः दु धकाः सिउ ।

यल उपमहानगरपालिका वडा नं. २१ या सिबाहालय् अर्थात नः त्वालय् देशय् मरु झ्याः दु । कलात्मक उगु झ्याः दुगु छेँ न्हापा अनया शाक्यतय्गु खःसा आः उगु छेँ मेपिन्सं हे न्याये धुंकूगु दु । देशय् मरु झ्याः मातनय् तयातःगु दु । न्हापाया छेँ पुलां जुयाः पियाः छ्वये धुंकूगु दुसा आः न्हूगु दंगु छेँय् तकं मातनय् नापं व हे थासय् अथे देशय् मरु झ्याः पलिस्था यानातःगु दु । यलया देशय् मरु झ्याः छगू कथंया तिकि झ्याः खः ।
किपाः नापं न्ह्यब्वःम्ह : सारासा