भ्रष्ट सरकारया छटपटी

लोकतान्त्रिक पद्धत्ति व परिपाटीं व्यागलं च्वनाः प्रतिगामी शक्तितय्गु अपवित्र गठवन्धनं दयेकूगु माधवकुमार नेपालया कामचलाउ सरकार थौं नैतिक रुपं नं पराजित भ्रष्ट सरकारया रुपय् म्हसीकेगु यानाच्वंगु दु । निथासं बांमलाक्क बूम्ह माधवकुमार नेपालया ल्यू ल्यू परराष्ट्र मन्त्री सुजाता कोइराला, रक्षा मन्त्री विद्यादेवी भण्डारी, गृहमन्त्री भिम रावल लगायत हरुवा मन्त्रीतय्गु बाहुल्यता दुगु वर्तमान कतांमरि सरकारं गन गन ल्हाःतल, गुगु गुगु ज्या यात व फुक्क फुक्कं गैरकानुनी ढंगं न्ह्याः वंगु प्रष्ट जूगु दु । सुडानया काण्डय् ४४ करोडया वन्दोवस्तीया सामान छ्वःगु लिइ३० करोड ला भ्रष्टाचार हे जूगु दु । नेपाल वायु निगम रिक्षकत हवाइ जहाज न्यायेगु प्रकृयाय् नं डर्जनौं मनूतय्गु बदमासी पिहां वःगु दु । थ्व वाहेक वर्तमान सरकारया विरुद्ध डर्जनौ भ्रष्टाचारया खँ नेपालय् जक मखु, खुद संयुक्त राष्ट्र संघं नं थःगु ध्यान सालाः नेपाः छगू भ्रष्ट व वदनाम देशकथं कायेधुंकूगु दु । अन्तराष्ट्रिय ख्यलय् हे तसकं हे बदनाम जूगु दु । थ्व स्वयाः न्ह्यः थुलितक बेइज्जत ला नेपाःया इतिहासय् गबले हे जूगु मदुनि ।

देश न्ह्याकीगु सरकार जायेक थौं भ्रष्टपिं मनूत च्वना च्वंगु दु । छम्ह मन्त्रीं मेम्ह मन्त्री छु गुलि बांलाक ज्या यात धकाः मखु, गुलि भ्रष्टाचार यायेफत गुलि कमिशन अप्वः नयेफत धकाः धेंधेंबल्लाः कासा जुयाच्वंगु दु । मन्त्रीं सचिवया गपः ज्वन, मन्त्रीं सिडियोया न्यतालय् मुइकल, छम्हय्स्यां मेम्हय्सिगु चरित्रय्न तकयाः सतक दथ्वी ध्याच्वः छ्वायेगु ज्या यात । गोप्यता, नैतिकता चरित्र सरकारय् च्वंपिं छम्ह छम्ह व्यक्तिया ख्वाःपाः नेपाःमि जनताया न्ह्यःने वल । तर नं कानुन छु झंगःया नां खः सरकारय् च्वंपिसं मस्यू, मथू । सरकार व सरकारय् च्वंपिं मन्त्रीतय्त न्ह्यात्थें याःगु अपराध याःसां कानूनं थीमखु, थीफैमखु धयागु मानसिकताया विकास जुयाच्वंगु दु । गुकियाहे लिच्वः खः मन्त्री जुयाः घुस नयेगु, भ्रष्टाचार यायेगु व कमिशनया नितिं न्ह्यात्थें याःगु अपराध यायेत नं लिफः तकं मस्वयेगु । उपप्रधानमन्त्री तक्क जुया नं कमिशनया नितिं थःपिनिगु लाज शर्मयात मियाः अर्वो ध्यबा नयाच्वंगु दु । हरेक अपराधीयात कारवाही यायेगु ला खँ हे छख्य न्ह्यसः तक्क तयेगु हिम्मत वर्तमान प्रधानमन्त्री माधव नेपाल याके मदु । अःखतं फलनागु टेण्डर डिस्कायात वीमाल पलानागु ध्यवा डिस्कातायात लःल्हायेमाः, अपराध व अपराधीतय्त कारवाही मखु पुरस्कार व सिरपालं छाय् पीमाः धकाः अःखतं पिर यायेगु जक ज्या जुयाच्वंगु अवस्थाय् छु खःगु व बांलाःगु ज्या बीगु आः सम्भव मदु । सरकारय् इमान्दारी व्यक्ति मालेत न्हिनय् हे मत च्याकाः मालेगु अवस्था वःगु दु ।

More Stories Like this