कांग्रेसयात ज्यामछिन
येँ (झीगु स्वनिगः)
एकीकृत माओवादीं मुलुकया कार्यकारी प्रमुख जनतापाखें प्रत्यक्ष निर्वाचनय् त्याकाः जक जुइमाः धकाः अडान तयाः वयाच्वंगु खःसा आः वयाः संविधानसभाय् दुथ्याःगु चिचीधंगु दलतय्सं नं कार्यकारी प्रमुख प्रत्यक्ष निर्वाचन त्याःम्ह जुइमाः धकाः थःपिनिगु अवधारणा तयाहःगु दु । म्हिगः विहिवाः २८ दलया मुँज्याय् अप्वः यानाः चिचीधंगु दलया नेतातय्सं अथे कार्यकारी प्रमुख जनतापाखें प्रत्यक्ष निर्वाचनं ल्ययेमाः धकाः थःपिनिगु अवधारणा तःगु खः । एमालें नं कार्यकारी प्रमुख जनतापाखें प्रत्यक्ष निर्वाचित जूम्ह जुइमाः धकाः अडान तयाः वयाच्वंगु दुसा नेपाली कांग्रेसं जक संसदीय व्यवस्था कथं संसदं जक कार्यकारी प्रमुख कथं प्रधानमन्त्री ल्ययेगु व्यवस्था यायेमाः धकाः अडान तयाः वयाच्वंगु खः ।
अथे चिचीधंगु दलतय्सं नं कार्यकारी प्रमुख प्रत्यक्ष निर्वाचनं हे ल्ययेमाः धकाः अवधारणा तयेवं नेपाली कांग्रेसयात तसकं ज्यामछिन धकाः धाःगु दु । थ्व हे झ्वलय् थौं शुक्रवाः जुइगु २८ दलया मुँज्याय् ततःधंगु दलतय्सं उगु विषययात कयाः थःथःगु धारणा तइगु जूगु दु ।
