'अनमिन वने धुंकाः छु जुइ धायेमफु’
येँ (झीगु स्वनिगः)
राष्ट्रसंघीय मिसन अनमिनया प्रमुख करिन लेनग्रेनं नेपालं अनमिन लिहां वने धुंकाः छु जुइगु खः धायेफुगु अवस्था मदु धकाः धयादीगु दु । राष्ट्रसंघीय सुरक्षा परिषदय् दक्ले लिपा बुधवाः चान्हय् नेपाः सम्वन्धी प्रतिवेदन न्ह्यब्वयेगु झ्वलय् लेनग्रेनं अथे धयादीगु खः । वय्कलं नेपालय् नाटकीय रुपं राजनीति न्ह्याः वनाच्वंगु दु धयादिसें गबले तक नाटकीय रुपया राजनीतिइ हिलीमखु अबले तक नेपालय् शान्ति प्रक्रिया पूरा जुइ धकाः धाये फैगु अवस्था मदु धकाः नं धयादिल ।
आः तक नं ल्वाभः व लडाकु अनुगमनयात निरन्तरता बिइगु नितिं निकाय गठन याये मफुगु अवस्थाय् अनमिन लिहां वने धुंकाः नं अन्यौलता हे ब्वलनीगु जूगुलिं कानुनी रिक्तता ब्वलनी धकाः लेनग्रेनं ख्याच्वः नं बियादिल । दलतय्गु निजी स्वार्थया कारणं नेपालय् शान्ति प्रक्रिया पूरा मजुइगु संभावना दु धयादिसें वय्कलं लोकतन्त्र हे खतराय् लाइगु अवस्था दु धकाः नं धयादिल ।
