अनमिनया वैकल्पिक संयन्त्र दयेकेगु कुतः

येँ (झीगु स्वनिगः)
नेपाःया शान्ति प्रक्रियाय् महत्वपूर्णगु भूमिका म्हिता वयाच्वंगु राष्ट्रसंघीय अनमिनया म्याद थप मजुइगु अवस्थाय् बैकल्पिक संयन्त्र दयेकेगु सवालय् संविधानसभाय् दुथ्याःगु मूमू स्वंगू दलया नेतातय् दथुइ सहलह जूगु दु । म्हिगः विहिवाः सिंहदरवारया शान्ति मन्त्रालयसं च्वंगु एकीकृत नेकपा -माओवादी), नेपाली कांग्रेस व नेपाल कम्युनिष्ट पार्टी -एमाले)या शीर्ष नेतातय् दथुइ जूगु मुँज्याय् अथे सहलह जूगु खः । वर्तमान कामचलाउ सरकारं अनमिनया म्याद थप मयाइगु अवस्थाय् आः छु गज्वःगु कथं शान्ति प्रक्रियायात पूवंकेगु धैगु खँय् जूगु सहलह मुँज्याय् अथे अनमिनया बैकल्पिक व्यवस्था यायेगु धकाः सहलह जूगु खः । स्वंगू दलया मुँज्यां अनमिन वने धुंकाः लडाकु समायोजन, रेखदेखया नितिं बैकल्पिक संयन्त्र दयेकेगु धकाः सहलह जूगु खः धकाः उगु मुँज्याय् ब्वति कयादीम्ह छम्ह नेतां धयादीगु दु । राष्ट्रसंघीय मिसन अनमिनया म्याद फुइगु गुन्हु जक ल्यं दनिगु अवस्थाय् अथे स्वंगू दलया नेतातय् दथुइ खँ जूगु खः । अनमिनया म्याद थ्व हे पुस मसान्त तक जक खः ।

मुँज्याय् माओवादीं अनमिनया म्याद वइगु जेष्ठ १४ गते तक हे थप यायेमाःगु खँय् बहः ब्यूगु खःसा कांग्रेस व एमालेया नेतातय्सं उकियात अस्वीकार यायेवं माओवादीं बैकल्पिक व्यवस्था यायेगु प्रस्ताव तःगु खः धकाः धाःगु दु । अनंलिपा माओवादीं छगू पुचः दयेकाः अनमिनं यानाच्वंगु ज्या याकेगु धकाः प्रस्ताव तःगु खःसा उकियात कयाः कांग्रेस व एमालें लिपा थःपिनिगु खँ तयेगु जुइ धकाः धाःगु खः धकाः छम्ह नेतां धयादीगु दु । मुँज्या लिपा माओवादीया न्वकु नारायणकाजी श्रेष्ठ प्रकाशं संचारकर्मीतलिसे खँल्हासें धयादिल 'सत्ताधारी प्रमुख दलतय्सं न्हूगु सरकार गठन याये न्ह्यः हे अनमिन वनेमाः धकाः तायेका संसदया अधिवेशन हे लिबाक्क सःतेगु यात तर नं थःपिन्सं अनमिनया म्याद थप यायेगु खँय् बहः बियाः वयाच्वनागु खः । इमिसं माने मजुइवं आः अनमिन मदैगु अवस्थाय् गुगु कथं न्ह्याः वनेगु धैगु खँय् सहलह केन्द्रीत जूगु दु । अनमिनया विकल्पया बारे यक्व हे बिचाः यानाः न्ह्याः वनेमाःगु दु, हथाय् चाये मजिउ ।'
उगु मुँज्याय् एकीकृत माओवादीया नायः पुष्पकमल दाहाल प्रचण्ड, न्वकुपिं मोहन बैद्य किरण, नारायणकाजी श्रेष्ठ प्रकास, नेपाली कांग्रेसया सभापति सुशील कोइराला, संसदीय दलया नेता रामचन्द्र पौडेल अथे हे एमालेया नायः झलनाथ खनाल, प्रधानमन्त्री माधव कुमार नेपाल, मूछ्याञ्जे इश्वर पोखरेलपिन्सं ब्वति कयादीगु खः ।