प्रत्यक्ष निर्वाचनं कार्यकारी प्रमुख ल्ययेमाः - चिचीधंगु पार्टी
येँ (सन्ध्या टाइम्स)/संविधान सभाय् दुथ्याःगु २८ दलया थौं सुथय् च्वंगु बैठकय् अप्वः यानाः चिचीधंगु दलया नेतातय्सं आः मुलुकय् कार्यकारी प्रमुख प्रत्यक्ष निर्वाचनं हे ल्ययेमाः धकाः धाःगु दु। न्हूगु संविधानया नितिं विवाद जुयाच्वंगु विषययात ज्यंकेत सिंहदरवारय् थौं सुथय् च्वंगु बैठकय् चिचीधंगु दलतय्सं थुकथं थःपिनिगु धारणा तःगु खः ।
बैठक लिपा एमालेया अध्यक्ष झलनाथ खनालं संचारकर्मीतलिसे खँ ल्हासें अप्वः यानाः चिचीधंगु दलया नेतातय्सं आः मुलुकया कार्यकारी प्रमुख प्रत्यक्ष निर्वाचनया माध्यमं हे ल्ययेमाः धकाः बः बियादीगु खँ न्ह्यथनादीगु दु ।
थौं सुथय् शासकीय स्वरुप निर्धारण समितिया प्रतिवेदन अन्तर्गत निर्वाचन प्रणाली व शासकीय स्वरुपया बारे सहलह ब्याकूगु इलय् दलया नेतातय्सं अथे धयादीगु खः।
अथे चिचीधंगु दलया अप्वः यानाः नेतातय्सं थौं थःपिनिगु धारणा तःगु खःसा ततःधंगु दलया नेतातय्सं धाःसा कन्हय् च्वनीगु बैठकय् जक थःपिनिगु धारणा तइगु जूगु दु।
बैठक लिपा एकीकृत माओवादीया उपाध्यक्ष नारायणकाजि श्रेष्ठ प्रकासं नं आःया शासन व्यवस्थासिबें पाःगु कथं जुइमाः धकाः थःपिंसं सः तया वयाच्वनागु खः धकाः धयादिल। थौंया बैठकय् ३ प्रतिशत मत हःगु पार्टीयात राष्ट्रिय पार्टीया मान्यता बीगु ला कि मबीगु धइगु विषययात कयाः नं सहलह जूगु खः। उच्चस्तरीय राजनीतिक कार्यदलं सहमति ब्वलंके मफुगु विवादित ८३ बुँदाया बारे थनिनिसें २८ दलया बैठकय् सहलह ब्याकूगु खः ।
एमालें प्रत्यक्ष निर्वाचनया माध्यमं हे कार्यकारी प्रमुख ल्ययेमाः धकाः थःगु मत न्हापांनिसें तया वयाच्वंगु खःसा एकीकृत माओवादीं नं प्रत्यक्ष निर्वाचनं हे निर्वाचत जूम्ह राष्ट्रपति हे कार्यकारी प्रमुख जुइ धकाः दावी याना वयाच्वंगु खः। नेपाली कांग्रेसं धाःसा संसदीय व्यवस्थापाखें ल्यःम्ह मनू हे कार्यकारी प्रमुख यायेमाः धकाः अडान तया वयाच्वंगु दु। अथे हे छुं छुं मधेसवादी दलं नं संसदं ल्यःम्ह मनू हे कार्यकारी प्रमुख संसदीय व्यवस्था कथं यायेमाः धकाः अडान तया वयाच्वंगु खः ।
