माओवादी दुने पिदंगु निगू लाइन

संविधानसभाया दकलय् तःधंगु पार्टी माओवादीं आः ज्वनीगु रणनीतिया बारे स्पष्ट विवाद पिहां वःगु दु। पार्टीया उपाध्यक्ष डा. बाबुराम भट्टराईनं आःया इलय् जनविद्रोह आवश्यक मदुनि धकाः अध्यक्ष प्रचण्डया दस्तावेजय् लिखित रुपं हे असहमति प्वंकादीवं माओवादीया सैद्धान्तिक विभाजन प्रस्ट रुपं हे पिहां वःगु खः। थुकिं यानाः आः पार्टी विभाजन जकं जू वनीगु खः ला धइगु ग्याःचिकु समेत पिहां वःगु दु ।

डा. बाबुराम भट्टराईं थ्व इलय् देशयात माःगु शान्ति व संविधान खः उकिं आः स्थायी शान्ति व बांलाःगु संविधान दयेकेगु ज्यायात हे थःपिंसं प्राथमिक ज्या तायेकाः न्ह्यायेमाः धइगु बिचाः तयादीगु दुसा मेपिं नेतातय्सं आः जनविद्रोह यानाः न्ह्याः मवंकं देशं निकास काये खनी मखुत धासें विद्रोहया लाइन हे न्ह्यःने हःगु खः। माओवादीं अपाय्हाकः जनयुद्ध यात। द्वलंद्वः मनू सित। उकिया उपलब्धी धइगु गणतन्त्र, संघीयता व धर्मनिरपेक्षता खः। तर न्हूगु संविधान दयेकेगु दौरानय् देशय् गुकथंया राजनीतिक चलखेल शुरु जुल उकिं यानाः धाःसा प्राप्त जूगु थ्व उपलब्धी नं सुरक्षित जुइगु सम्भावना क्षीण जुया वनाच्वंगु दु। थज्याःगु अवस्थाय् ला आः हानं छक्वः जनविद्रोह मयायेकं वयेधुंकूगु उपलब्धी तकं ताःलाइगु स्थिति मदु। थ्वहे खँयात वाःचायेकाः अध्यक्ष प्रचण्ड लगायतया नेतातय्सं विद्रोहया लाइन ज्वंगु जुइफु। तर उगु लाइनयात कयाः पार्टी दुने डा. भट्टराई थेंज्याःपिं विचारक नेतातय्सं हे असहमति क्यंगु कारणं उकिया बारे पुनर्विचार यायेगु व वय्कःपिंत नं समावेश यानाः न्ह्याः वनेगु नीति काःसा पाय्छि जुइगु खनेदु ।

More Stories Like this