नमूना विद्यार्थी

सुनिता मानन्धर

'बसय् च्वनेबलय् जिके क्याम्पसया कार्ड दु धाःसां सुनां पत्याः मयाः। नकली कार्डयात छुट बी मखु धाइ।' खुइस्वदँ दुम्ह मय्जु रमालक्ष्मी ताम्राकारया अनुभव खः थ्व। थौंकन्हय् नेपालभाषा कन्द्रीय विभाग पाटन क्याम्पसय् वय्कः नेपालभाषा एमए ब्वना च्वनादीगु दु। प्यम्ह काय व छम्ह म्ह्याय्या मां वय्कः न्हिंन्हिं हे क्याम्पस थ्यं।
वय्कःया छेँ बनेपाया वडा नं. १५ तीनदोबाटाय् खः। सुथसिया पौने ५ जुल कि वय्कः येँय् वइगु बसपार्कय् थ्यनेधुंकी। बनेपां यलया दूरी २९ किमि दु। तर वय्कःयात धाःसा छुं हे थाकु मचाः। धयादी, 'क्याम्पस वयाः जिं यक्व हे ज्ञान काये खन। छेँय् च्वनाच्वंसा अथें हे ई सितिकं वनीगु खः ।'

अथे ला वय्कः च्यागू तगिमय् ब्वंगु इलय् नं नेपालभाषा कयाः हे ब्वनादीगु खः। गुगुं तगिं थ्यंकाः पूर्ण वैद्य सरं नेपालभाषा सफूया नापनापं पत्रपत्रिकाया नं ज्ञान बियादीगुलिं वय्कःया मन नेपालभाषाया ख्यलय् क्वसाल। वय्कलं नेपालभाषा विषय कयाः एसएलसी नं पास यानादिल। २०२२ सालया भाषा आन्दोलनय् नं वय्कलं ब्वति कयादीगु खः। उगु ईया खँ लुमंकाः कनादी, 'जिगु जन्म असं त्वालय् जूगुलिं मचांनिसें हे प्रेमबहादुर कसाः थेंज्याःपिं भाषासेवीतलिसे बांलाःगु स्वापू दु। २०२२ सालया आन्दोलन जूबलय् नं छेँज्या क्वचायेवं प्रेमबहादुर कसाःपिं नाप गबलें येँय्, गबलें यलय्सा गबलें ख्वपय् वनेगु। अन सकसिनं कविता पाठ याइगु। जिं नं तःक्वः हे ब्वति कया।'
पेशां वय्कः छम्ह शिक्षिका खः। वय्कलं नाला, धौख्यः व पन्तिया स्कूलय् आखः ब्वंकादीगु दु। आः वय्कः रिटायर्ड अवस्थाय् दु। थ्व उमेरय् वयाः हाकनं ब्वनेगु इच्छा गनं वल धकाः न्यनाबलय् वय्कलं धयादिल, 'दकलय् न्हापां ला रिटायर्ड जुइवं याउँक छेँय् च्वने मास्ते वल। तर निदँ छेँय् च्वनाबलय् म्हाइपुया वल। जितः मेपिं थें द्यइके वने नं मं मदु। थ्वहे झ्वलय् यलय् च्वंम्ह पासा काजीमान डंगोलयात फोन याना। वय्कलं हे नेपालभाषा एमए ब्वंसां जिउ नि धकाः सुझाव बियादिल। वय्कःया हे सुझाव कथं भर्ना जुयाः ब्वनाच्वनागु खः ।

अथे ला वय्कःया काय नं वय्कः नापं तुं थ्वहे क्लासय् ब्वनाच्वंगु दु। वय्कःया काय येँय् हे च्वनादी। क्लास क्वचायेवं कायं वय्कःयात बसपार्क तक त्वःता बी।
मां-काय नापं आखः ब्वनाच्वनेबलय् मछिं मजू ला धइगु न्ह्यसःया लिसलय् वय्कलं धयादिल, 'मजू। न्ह्याम्ह नाप च्वनाः ब्वंसां सयेकेगु ला ज्ञान हे खः। क्याम्पस जक मखु छेँय् नं ला कम्प्युटरय् जिं मसिउगु फुक्क कायपिंसं हे स्यना बीगु ला खः नि ।'

थुकी तुं वय्कलं हानं तनादी, 'जिगु एमए सिधल कि मेपिं काय व भौपिंसं नं नेपालभाषा एमए ब्वनेगु इच्छा प्वंकूगु दु ।'

थज्याःगु जाँगर खनीबलय् वय्कःयात छम्ह साहसी व्यक्ति कथं कायेमाः। वय्कःया नेतृत्वय् भ्वतय् 'नारी दलूचा' पत्रिका नं पिहां वयाच्वंगु दु। अथे हे वय्कलं धौख्यःया नमोबुद्ध एफएमय् नेपालभाषा ज्याझ्वः न्ह्याकेगु ज्या नं याना च्वनादीगु दु। थज्याःगु ज्याझ्वः न्ह्याकेया लागिं ग्वाहालि जुइमा धकाः नं थम्हं एमए कक्षा कयागु खँ वय्कलं कनादी। धयादी, 'जिगु नेपालभाषा ज्याझ्वलय् क्लासय् थम्हं ब्वनागु खँ जक न्ववाना बिउसां यक्व हे फाइदा जू ।'

गन इच्छा दु अन उपाय नं दु धाइगु खँपुयात रमालक्ष्मीजुं पूवंकादीगु दु। वय्कलं क्यनादीगु थ्व उत्साहपाखें सकलें मिसा जाति व मेपिंत नं प्रेरणा दइगु खँय् निगू मत मदु ।

More Stories Like this