उपभोक्ता सचेत जुइमाः : मन्त्री चेम्जोङ

येँ (झीगु स्वनिगः)

शान्ति लिसे पुनःनिर्माण मन्त्री रकम चेम्जोङं सरकारयात दवाब बिइत उपभोक्ता हे सचेत जुइमाःगु खँ कुलादीगु दु । खाद्य प्रविधी लिसे गुण नियन्त्रण विभागया स्वर्ण महोत्सव ज्याझ्वलय् वय्कलं उपभोक्तां थःगु हितया नितिं थःहे सचेत जुइमाःगु धयादीगु खः । ज्याझ्वलय् उपभोक्ता मञ्चया नायः प्रेमलाल महर्जनं उपभोक्ता राज्यपाखें हे ठगय् जुयाच्वंगु नुगः खँ प्वंकादीगु दु । वय्कलं खाद्य अनुसन्धान विभागय् मुक्कं पीछम्ह कर्मचारी छ्वयेवं खाद्यान्नया बांलाक्क निरीक्षण जुइमफइगु स्पष्ट यानादीगु खः । छगू तथ्याङकथं विश्वय् दँय्दँसं थ्यंमथ्यं झिंप्यंगू लाख मनूत नसा व लःपाखें पिज्वइगु ल्वय्या शिकार जुइगु यानाच्वंगु दुसा न्यादा क्वय्या थ्यंमथ्यं छगू अर्ब न्यय्गू करोड मिसा मस्त व मिजं मस्त झाडाबान्ता व कुपोषण पीडित जुयाच्वंगु दु ।

झाडाबान्ता व कुपोषणपाखें हलिमय् थ्यंमथ्यं स्वीगू लाख मिसा मस्त व मिजं मस्त सीगु यानाच्वंगु दु । नेपालय् थौंकन्हय् पीछगू जिल्ला खाद्य सङ्कटया अवस्थापाखें न्ह्यानाच्वंगु दु । संसारय् भोकमरी जूगु देशय् नेपाः न्यय्प्यंगूगु थासय् लाः ।