डा. भट्टराईलिसे मू दलया नेतापिं भारतपाखे
येँ (झीगु स्वनिगः)
शान्ति, संविधान व नेपाः सम्बन्धि सम्मेलनय् ब्वति कायेत मू दलया सभासद् व विज्ञत म्हिगः भारतया न्हू दिल्लीपाखे वंगु दु । थौंनिसें न्ह्याइगु सम्मेलनय् ब्वति कायेत एकीकृत नेकपा माओवादीया न्वकु डा. बाबुराम भट्टराई व वर्षमान पुन 'अनन्त', नेपाली कांग्रेसया प्रकाशमान सिंह व प्रदीप गिरी, नेकपा एमालेया प्रदीप ज्ञवाली व अग्नी खरेल लिसे फोरम लोकतान्त्रिकया जितेन्द्र देव न्हू दिल्ली झायादीगु खः ।
विवेकानन्द फाउन्डेशनपाखें ग्वसाः ग्वःगु सम्मेलनय् ब्वति कायेत पुलांम्ह सभामुख दमननाथ ढुङ्गाना व संविधानविद् डा. भीमार्जुन आचार्य, पुलांम्ह प्रधानसेनापति रुक्माङ्गत कटवाल, अर्थविद् विश्वम्भर प्याकुरेल नं न्हू दिल्ली झायादीगु दु ।
भारतया विदेशमन्त्री एसएम कृष्णां नं क्वति काइगु सम्मेलनय् राजनीतिक समझदारीया नीति, संविधान च्वयेगु, शान्ति प्रक्रिया, तराईया समस्या व नेपाःया अर्थतन्त्र लगायत विषयसं ब्यागलं ब्यागलं सत्रय् सहलह जुइ ।
