सेनाया लोकतान्त्रिकरण सम्बन्धी बिस्तृत कार्ययोजना तयार
येँ (झीगु स्वनिगः)
सरकारं नेपाली सेनाया लोकतान्त्रिकरणया नितिं बिस्तृत कार्ययोजना तयार याःगु दु । रक्षा मन्त्रालयया छ्याञ्जे नबिन घिमिरें सेनाया लोकतान्त्रिकरण सम्बन्धी बिस्तृत कार्ययोजना थौं राज्य व्यवस्था समितिया बैठकय् न्ह्यब्वःगु दु । कार्ययोजनाय् राष्ट्रपतिं सेनाया परिचालन यायेगु व विश्व विद्यालय तहया पाठ्य सफुतिइ रक्षा सम्बन्धी बिषययात कःघायेत सुझाव ब्यूगु दु ।
रक्षा छ्याञ्जे घिमिरें सेनाया लोकतान्त्रिकरणया कार्ययोजनाय् मानव अधिकार, राजनीतिक प्रभावपाखें ताःपाकेगु, व्यवस्थापन तह, समावेशी लगायत च्यागू विषययात आधार तायेकूगु जानकारी बियादीगु दु ।
वय्कलं एकीकृत नेकपा माओवादीया स्थायी समिति दुजः वर्षमान पुन 'अनन्तं' सेनाया लोकतान्त्रिकरणया कार्ययोजना वइगु सकारात्मक जूसां नं सत्तारुढ दलतय्सं जक जस दइकथं दयेकूगु धयादिसें विरोध यानादीगु खः । वय्कलं सेनाया लोकतान्त्रिकरणय् माओवादीया धकाः महत्वपूर्ण भूमिका जूगु धयादिसें उखेपाखे ध्यान बिइत इनाप यानादीगु दु ।
