चाकूगु तुया धात्थेंया यथार्थ

नवलपरासी (झीगु स्वनिगः)

दच्छियंक ज्या याना गर्जो टारय् यायेगु तुया बिक्री जुइमफयाः थनया किसानत निराश जूगु दु । तुया मू इलय् हे निर्धारण मजुयाः किसानया तु क्यबय् अथेहें गनाः सितिं वनीगु अवस्थाय् दु । वंगु दँ प्रति क्विन्टल ५७० मू दुगु थनया किसानं थुगु दँ चिनी मिलं प्रति क्विन्टल ३४८ तका मू कायम यायेधुंकाः तु बिक्री मयाःगु कारण तु क्यबय् हे गनाः सितिं वनीगु अवस्थाय् थ्यंगु खः । नवलपरासी लगायत तराईया झिंच्यागू जिल्लाय् जुइगु तु खेतीयात राज्यं बेवास्ता याःगु कारण तु किसानं उत्पादन कायेगु इलय् आन्दोलन यायेमाःगु तु उत्पादक किसान समितिया न्वकु दूधनाथ गुप्तां धयादिल । पुसया स्वंगूगु वाः न्ह्यायेधुंकाः नं किसानया तु क्यबय् हे लानाच्वंगु धासें चिनी उद्योग व सरकार मिलय् जुयाः जनताया प्वाः स्यायेमाःगुलिं थःपिंसं आन्दोलनया विकल्प मखंगु गुप्तां धयादिल ।

सरकारं पर्यटन दँ न्ह्याःसांनिसें चक्काजाम मयायेगु धयाः वयाच्वंसां नं थःगु प्वाःया नितिं सरकारया ध्यान सालेत थःपिं चक्काजाम नापं यायेत बाध्य जूगु किसानया धापू दु । वि.सं. २०५९ लिपा दँय्दँसं किसानत तुया मूया नितिं आन्दोलित जूसां नं सरकारी तहपाखें राष्ट्रियबालीया रूपं मस्वयाः थःपिं मर्काय् लानाः वनाच्वंगु नुगः खँ किसान परमहंस चतुर्वेदीं धयादिल । लुम्बिनी चिनी कारखाना सरकारी स्वामित्वय् जुलंतक्क नं तु बिक्री जुइगु यानाच्वंगु जूसां नं भुक्तानी कायेगुलिइ समस्या फयाच्वंपिं किसानं उगु चिनी कारखानाया निजीकरणलिसे तु बिक्रीइ हे समस्या फयेमालाच्वंगु दु ।बागमती चिनी उद्योग, इन्द्रसुगर मिल व लुम्बिनी चिनी कारखाना नवलपरासीइ हे जूसां नं नवलपरासीया हे किसान तु व्यापार मजुयाः हैरानीइ लानाच्वंगु दु । व्यापारया नितिं तु तयार जुइ स्वयाः झिंन्यान्हु न्ह्यः मूल्य निर्धारण यानाः तु मिल चलय् यायेमाःगु किसानतय्सं धाःगु दु । सरकारं नीस्वंगु तु बोर्डं नापं छु नं ज्या मयानाः समस्या झन् अप्वःगु दु । कृषि मन्त्रालयं किसानया हकया नितिं स्वयाः नं थः मनूतय्त जागिर नकेत तु बोर्ड दयेकूगु किसानतय्गु द्वपं दु ।

More Stories Like this