अकर्मण्यताया माकःजाः

- आनन्ददेव भट्ट

एकीकृत नेकपा -माओवादीं) या नायः पुष्पकमल दाहाल "प्रचण्ड" २०६६ साल बैशाख २० गते राजिनामा व्यूगु लिपा उगु पार्टीयात शान्ति व चैन मदु । तत्कालिन प्रधानमन्त्री प्रचण्डं पुलांम्ह प्रधान सेनापति रुक्मांगद कटवालयात अनुशासनया कारवाहीकथं पदं चीकुसा गणतन्त्र नेपाःया न्हापाम्ह राष्ट्रपति डा. रामवरण यादवं पदय् बहाल यायेवं थ्व राष्ट्रपतिया वर्तमान अन्तरिम संविधान व सरकारया कार्यकारी अधिकार विरुद्ध जूगुलिं थुकियात कया व्यवस्थापिका संसदय् छलफल जुइमाः व राष्ट्रपतिं थुज्वःगु गैरसंवैधानिक ज्या याःगुलिं क्षमा फ्वनेमाः । मेख्य व्यवस्थापिका संसदयाहे वहुसंख्यक पार्टीतय्सं तत्कालिन प्रधानमन्त्री प्रचण्डं सरकारय् सहभागी मेमेगु पार्टीतय्सं प्रधानसेनापति चीकेगु खँय् असहमति प्वंकुसे सरकारं हे राजिनामा वियाः पिहां वन । थुया लिपा संसदया वहुमतं एमालेया वरिष्ठ नेता माधव कुमार नेपाल प्रधानमन्त्री जुल । थुगुकथं माओवादी व संसद न्हूगु सरकार दयेकूपिं पार्टीतय्गु दथ्वी झिंगुलां निसंे लगातार मतमतान्तर व द्वन्द्व जुया वःगु दु । माओवादीं माधवकुमार नेपालया वर्तमान सरकारयात धात्थेंला छुनं मान्यता ब्यूगु मदुनि । थ्व सरकार कतांमरि सरकार, रिमोट कन्ट्रोलं न्ह्याइगु सरकार खः, थ्व संविधानसभा व व्यवस्थापिका संसदया मानो वैधानिकता हे मदयेक जवरजस्ती छुं वहुसंख्या सदस्यया वलय् जवरजस्ती सत्ताय् च्वनाच्वंगु दु । धाथें थुगु सरकारया नीप्यंगू घौ विरोध यायेगु व सरकारया गतिविधितय्त गथ्य ज्यू, पंगः थनेगु राजनीति व कार्यशैली नालाः वःगु दु ।

उखे माधव नेपालया सरकारं नं प्रमुख प्रतिपक्षं थथे जवरजस्ती याःसां जिमित नं वइगु हे वास्ता मदु धैथें थःगु हे पहलं वना च्वंगु खनेदु । थथे सरकार व प्रतिपक्षयादथ्वी द्वन्द्व न्ह्यानांवःगु दु । छम्हय्स्यां मेम्हय्सित वास्ता मयायेगु प्रवृत्तिं तःधंगु थाय् कयावःगु दु । गणतन्त्र नेपाः दंनावःगु पाय्छि स्वदँ यं बलय् गणतन्त्रवादी संविधान दयेकाः वइगु न्हि लुखा खुल्हुइ बःवलय् नं संविधानसभा व व्यवस्थापिका संसदया थुपि निपुचः पार्टी दथ्वी थुज्वःगु नीरस व बांमलाःगु व्यवहारं जुइगु देशया वर्तमान अवस्थाया नितिं जक मखु भविष्यया नितिं नं कयाः हे हितकर मदु । अथ्यला संविधान दयेकेगु ज्या देशया संविधानसभानं खः व वं थःगु ज्या थौं तक्कया दुने करीव करीव क्वचायेके माःगु खःसां क्वचाःगु मदुनि । अथ्यला प्रमुख प्रतिपक्ष व सरकारया दथ्वी ब्वलानाच्वंगु मनमुतावया वावजुत छुं प्रगति जूगु मदु धाये थाय् मदु । थुकिं यानाः संविधान इलय् दयेकेगु खँ धरापय् लानाच्वंगु दु । मेख्य सरकारं नं देशय् शान्ति सुरक्षा, अमन चैन, कानुनया शासन व राष्ट्रया दैनिक जीवनय् सरकारं यायेमाःगु विकास, निर्माण व आम जनताया गाँस, बास, कपास, स्वास्थ्य, शिक्षा, सुरक्षाया क्षेत्रय् यायेमाःगु न्यूनतम कर्तव्य नं सन्तोषजनक ढंगं पूवंकेफूगु मदु । सरकार नं प्यख्यरं घोर अकर्मण्यता, असफलताया माकःया जालय् लाःगु दु ।

देशया थुज्वःगु अवस्था जूगुलिइ वर्तमान सरकार जक जिम्मेवार दु । छाय् धाःसा देशया संविधानसभा व व्यवस्थापिका संसद न प्रतिपक्षयागु जक खः नत सरकारयागु जक । निखलकं थःगु सीमा व कर्तव्य मथुइकल धाःसा देश न्ह्यःने वनी मखु, व दथ्वीइ अलमलय् जुइ । प्रतिपक्षं देशयात अलमलय् यात धकाः दंग जुइगुया छुं आवश्यकता मदु व सरकारं नं प्रतिपक्षयात व्यागलं तयेधुन धकाः धायेगुली गौरववोध यायेगु ज्या यायेमज्यू । आखिर सरकार व प्रतिपक्ष संविधान सभा व व्यवस्थापिका संसदया अभिन्न उपज खः । थथ्य सरकार व प्रतिपक्षदथ्वी थौंया दूरी मदयेकेहे माः । थथ्य थौंया नेपाःया राजनीतिइ झीगु राजनीतिज्ञ नेतातय्सं देश व जनतायात धरापय् तयेगु छु नं ल्याखं कल्याणकारी ज्या जुइमखु । आः देशं वार कि पारया लुखां दुहां वने हेेमाः । उकिं व्यवस्थापिका संसदया प्रतिपक्ष पार्टी माओवादीं प्रष्ट धारणा दयेके माल वं वर्तमान सरकारया विकल्प दयेकेत माःगु ज्या खँ तत्काल न्ह्याकेमाः । वर्तमान सरकारयात तयातयेगु मखु, वांछ्वयेत यायेमाःगु ज्या न्ह्याकेमाः । हस्तक्षेप अप्वयेके माल । संसदय् थःगु शत्तिःया अनुपातय् दुहांवनाः सरकारया नालायकीपना क्यनाबीमाः । अथ्यहे जेठ १४ दुने गणतन्त्रात्मक लोकतान्त्रीक संविधान दयेकाः क्यनावी माल । थ्व सरकार कतामरि व दलालपनायात ह्याउँगु लासा लानाः देश व जनतायात नष्ट यायेत स्वयाच्वंगु खःसा उगु खँया सक्रमण जनताया न्ह्यःने तयाः सरकार विरुद्ध जनसंघर्ष न्ह्याकेमाल । थथ्य यायेफुसा जक नेपाली जनतां दलाल, प्रतिगमन व निरंकुशता विरुद्ध पासा वी ।

वंगु निदँया दुने सरकार परिवर्तन व उकिया नेतृत्वया नितिं गुलिनं खँत वल उकिं सरकारया नेतृत्व यायेगु खँय् बहः व्यूगु खनेदु । थःपिन्त मेपिसं ग्वाहालि मयाःगु इलय् नेतृत्वहे माः धायेगु खसाः देशया संविधान दयेकेगु खँ यात प्राथमिकता बीगु बांलाइ । संविधान दयेके धुंकाः सरकारया नेतृत्व यायेगु हे वइ, धैगु खँयात लुमंकेगु वुद्धिमानी जुइ । देशया दकले तःधंगु पार्टी माओवादीयात नेतृत्वयाके बिइवं यक्को समस्याया समाधान थः थम्हं जुइ । तःधंगु दलयात नेतृत्व मवीगु गैर लोकतान्त्रिक खँ खः । लोकतान्त्रिक विपरित लँपुं वनाः छुनं पार्टीं सफल जुइ मखु । लोकतान्त्रिक परिपार्टी पिहां वनाः याइगु व्यवहारं अन्ततःउगु पार्टीया भविष्य दैमखु ।

More Stories Like this