ल्वाभः फ्वनेगु हैसियत दुला ?

विस्तारवादी भारतया हलुमान जुयाः प्रधानमन्त्री जुइत ताःलाःम्ह माधवकुमार नेपालं प्रधानमन्त्री पदं राजिनामा व्यूगु नं खुला पुले धुंकल, तर नं वइगु २५ गतेनिसं न्ह्याइगु व्यवस्थापिका संसदं छम्ह प्रधानमन्त्री ल्ययेगु प्रकृयायात कयाः थथ्यहे धकाः धायेफूगु स्थिति मदु । संविधानसभाया दकले तःधंगु दलया हैसियतं माओवादीया नेतृत्वय् सहमतिया सरकार दयेकेमाःगु खः । तर गैरलोकतान्त्रिक प्रकृयां सरकारय् सहभागी संसदीय दलतय्सं लोकतन्त्रया नामय् म्वाः मदुगु द्वपं वियाः सरकारं पिनेतयातःगु दुसा हरुवा व चरुवातय्सं मन्त्रीमण्डलय् च्वनाः नं त्वःतेगु नां तक्क नं कयाच्वंगु मदु । न्हूगु संविधान दयेकेगु ज्या सुथांलाक्क न्ह्यानाच्वंगु मदु, मेख्य शान्ति प्रकृया अःखः अनमिनयात लित छ्वयेत सनाच्वंगु दु, सेना समायोजनया ज्या नं ठोसरुपं खाका न्ह्ःयने वयाच्वंगु मदु । थुज्वःगु अवस्थाय् थःगु अधिकार व हैसियत मदुगु काम चलाउ सरकारं क्यान्टोमेन्टय् थन्कय् जुयाच्वंगु ल्वाभः माग याःगु दु । थ्व सरकारयागु मचा स्वभाव धायेगु लाकि मूर्खता ? क्वछीत थाकुयाच्वंगु दु ।

वर्तमान माधवकुमार नेपालया कामचलाउ सरकारं थःगु भ्याःभी वुद्धिविवेक नं तंके धुंकूगु दु । घुस, भ्रष्टाचार व कमिशनया छगू धुंकाः मेगु काण्डं देशयातहे बर्वादीया गालय् क्वफायेगु ज्या जुयाच्वंगु दु । अन्तराष्ट्रिय ख्यलय् न्हिन्हिथं वेइज्जती जुयाच्वंगु दु । राष्ट्रसंघ वियावयाच्वंगु शान्ति सेना नेपाःयात व्यागलं तइगु अवस्था वयाच्वंगु दु । विदेशय् वनेवलय् नेपालीतय्त याइगु वेइज्जतीं सु नेपाःमिया कपाः मस्याः जुइ ? थुज्वःगु अवस्थाय् सरकारय् सहभागी दलत धाःसा भारतया इसाराय् कलाःयात वर्‍हः तयां मगानाः थःयात मगानाः थःयात जन्मय् याःम्ह थः मांयात न्हू दिल्लीइ मीत तछाडमछाड यानाच्वंगु दु । भारतया इसाराय् नेपाःयात सिक्किमीकरण यायेत स्वयाच्वपिं कांग्रेस-एमालें शान्ति प्रकृया अःखः माओवादीयात व्यागलं तयाः प्रतिपक्षय् च्वनेत वाध्य यानाच्वंगु दु । थःथत्थे मनय् वःथे, प्रतिपक्षया स्वीकृति व सहमति मकासे मनय् वःथे सरकार न्ह्याका वयाच्वंगु दु । सेना समायोजन न्ह्यानाच्वंगु मदु, न्हूगु संविधान दयेकेगु ज्या अथें लानाच्वंगु दु ।

थुज्वःगु अवस्थाय् सरकारं ल्वाभः माग यायेगु न उपयुक्त ई खः नतः प्रकृयाहे । छगू खास व ठोस खाका मवयेकं न सेना समायोजन जुइ नत यान्टोमेन्टय् च्वनाच्वंपिं १९००० जनसेनायात चीकेफै । थुगु परिपेक्षय् ल्वाभःया माग यायेगु अवस्थाहे मखु । अथ्य खयानं सरकारं छु व छाय् छु प्रयोजनं ल्वाभःया माग यात सीकेफूगु मदु । गनतक्क क्यान्टोमेन्ट खाली यायेगु व ल्वाभः सरकारयात लःल्हायेगु खँ दु, थ्व न्हूगु संविधान दयेके धुंकाः सेना समायोजन लिपा जक न्ह्याकेगु प्रकृया खः । अविश्वासया वातावरण दयेकाः ल्वाभः फ्वनेगु धयागु न्हिइकेगु ज्या खः । माओवादीयात निशस्त्र यानाः दमन यायेगु म्हगस स्वयेगु बेकार खः ।

More Stories Like this