उत्पीडन मदु धकाः अनुमोदन यानाः नेवाः एकता दिवस हनीगु
येँ (झीगु स्वनिगः)
वइगु पोहेलाथ्व नवःमि पुस २९ गते विहिवाः यलय् नेवाः जाति दुने जातीय उत्पीडन मदु धकाः सन्देश बियाः नेवाः एकता दिवस हनीगु जूगु दु । नेवाः स्वायत्त राज्य मंकाः संघर्ष समितिया ग्वसालय् वंगु छुं दिं न्ह्यः जक नेवाः राष्ट्रिय राजनीतिक सम्मेलन यानाः जारी याःगु घोषणा पतिइ जयस्थिति मल्लया इलंनिसें दुगु नेवाः दुनेया जातीय विभेदयात अन्त्य यानागु जुल धकाः घोषणा याःगु खःसा व हे घोषणा यात वइगु विहिवाः नेवाः दुनेया २८ गू जातिपाखें सर्वाजनिक रुपं अनुमोदन याइगु जूगु दु ।
उखुन्हु यलया पूच्वं सांस्कृतिक जुलुस न्ह्याये न्ह्यः जुइगु सभाय् हे नेवाः दुनेया ज्यापु, स्यस्यः, साय्मि, नायः, कपाली, द्यःला, पुतवार, गुभाजु, उदाय, ताम्रकार, शिल्पकार नापं थीथी कथंया २८ जातीया प्रतिनिधितय्सं अथे जातीय उत्पीडन मदु धकाः अनुमोदन याइ धकाः धाःगु दु । थगुनि नेवाः स्वायत्त राज्य घोषणा जूगु दिंयात लुमंकाः तिथि कथं नेवाः स्वायत्त राज्य मंकाः संघर्ष समितिया ग्वसालय् जुइगु नेवाः एकता दिवसया नितिं व्यागलं कथंया नेवाः एकता दिवस व्यवस्थापन समिति दयेकाः माःगु कथं तयारी यानाः च्वंगु दु ।
