प्रमयात नाप हे लानाः आपत्ति
येँ (झीगु स्वनिगः)
राष्ट्रसंघीय मिसन अनमिनयात लितछ्वयेत यकःति कथं पौ च्वःगु नापं माओवादीया सेनाया ल्वाभः नापं मेमेगु सामान माल धकाः तकं यकःति कथं पौ च्वःगुयात कयाः म्हिगः बुधवाः कामचलाउ सरकारया प्रधानमन्त्री माधवकुमार नेपालयात नाप हे लानाः एकीकृत नेकपा -माओवादी)या नायः पुष्पकमल दाहाल प्रचण्डं आपत्ति प्वंकादीगु दु । अनमिनयात पौ च्वये न्ह्यः सुं नं दलतलिसे नापं शान्ति प्रक्रियाया छगू पक्ष एकीकृत माओवादीलिसे सहलह हे मयाःगुलिं माओवादीया नायः प्रचण्डं दुःख नं प्वंकादीगु खः ।
अथे पौ च्वःगु धैगु विस्तृत शान्ति सम्झौताया अःखः जुल धकाः तकं प्रचण्डं आपत्ति प्वंकादीगु खः । सरकारं अनमिनयात पौ च्वयाः लडाकुतय्गु ल्वाभः, लडाकु नाप स्वापू दुगु सामान नापं फुक्कं कथंया भ्वं तकं सरकारयात माल धकाः पौ छ्वःगु खः । अनमिनया म्याद थ्व हे पुष महिना तक जक ल्यं दनिसा म्याद थप यायेमाः धकाः माओवादीं सः तयाः वयाच्वंगु खः ।
