माओवादीपाखें फागुन १ निसें संघर्ष

चैत्रंनिसें प्रतिरोधात्मक आन्दोलन याइगु

येँ (झीगु स्वनिगः)

संविधानसभाया दक्ले तःधंगु दल एकीकृत नेकपा -माओवादी)या केन्द्रीय समितिया म्हिगः बुधवाः क्वचाःगु मुँज्यां वइगु फागुन १ गतेनिसें संघर्ष यायेगु खँ क्वःछ्यूगु दु । राष्ट्रियता, शान्ति , संविधानया नितिं माओवादीं अथे संघर्ष यायेगु खँ क्वःछ्यूगु खः । आन्दोलनया झ्वलय् चैत्र महिनानिसें प्रतिरोधात्मक संघर्ष यायेगु अले बैशाखय् आन्दोलनया उत्कृष्टय् थ्यंकेगु कथं तयारी यायेगु नं खँ क्वःछ्यूगु दु धकाः माओवादी छम्ह नेतां कनादीगु दु । आन्दोलनया झ्वलय् माघ ३ गतेनिसें १७ गते तकया दुने आन्तरिक तयारी कथं प्रशिक्षण ज्याझ्वः यायेगु, १७ गतेलिपा थाय् थासय् जनसभा यायेगु खँ नं क्वःछ्यूगु दु ।
पार्टीया केन्द्रीय ज्याकू कोटेश्वर या पेरिस डाँडाय् जूगु केन्द्रीय समितिया मुँज्यां छुं छुं जिम्मेवारी नं हेरफेर याःगु दु ।

आवंलि पार्टीया नायः पुष्पकमल दाहाल प्रचण्डं समग्रय् भाला कयादीगु दुसा संगठन विभागया प्रमुख मोहन बैद्य किरणयात ब्यूगु दु । माओवादीया युवाया भाला विप्लबयात, जनमुक्ति सेनाया इन्चार्ज अनन्त, आः विशेष ब्यूरो नेवाः व ताम्सालिङ नापं कार्यालयया भाला रामबहादुर थापा बादलयात ब्यूगु दु । थ्व हे दथुइ माओवादीं थःगु हे नेतृत्वय् सरकार दयेकेगु नितिं माःगु कथंया कुतः यायेगु धकाः नं क्वःछ्यूगु दु ।