राष्ट्रपतियात महाभियोग तइगु
थौं प्रमया संवोधन
एमाले नं राष्ट्रपतिया विपक्षय्
सरकारं प्रधानसेनापति रुक्मांगद कटवालया चीकूगु व राष्ट्रपति डा. रामवरण यादवं म्हिगः सरकारयात छ्वया हःगु पितं यानाः देशय् ब्वलंगु राजनीतिक परिस्थितियात कयाः थौं प्रधानमन्त्री पुष्पकमल दाहाल 'प्रचण्डं' देशवासीया नामय् संवोधन यायेत्यंगु दु । वय्कलं थौं न्हिनय् ३ बजे देशवासीया नामय् संवोधन यानादी ।
थौं सुथय् च्वंगु माओवादी केन्द्रीय सचिवालयया बैठक लिपा प्रधानमन्त्रीं देशवासीया नामय् संवोधन यानादी । थौं न्हिनय् १ बजे च्वनीगु मन्त्रिपरिषद्या बैठकं वय्कलं यानादीगु संवोधन भाषण तयार याइगु खँ सीदुगु दु ।
थौं च्वंगु माओवादीया केन्द्रीय सचिवालयया बैठकं राष्ट्रपतिया पलाः असंवैधानिक जूगु धासें थुकियात छगू कथंया &'कू'या रुपय् काःगु दु । राष्ट्रपति ल्ह्वंगु थ्व पलाः नागरिक शासन प्रति याःगु मेगु प्रहार खः धासें थुकिया विरुद्ध सर्वोच्च अदालत वनेगु निर्णय नं माओवादीं याःगु दु । अथे हे बैठकं राष्ट्रपतिया थ्व पलाःया विरुद्ध वय्कःयात महाभियोग तयेगु प्रकि्रया न्ह्यःने यंकेगु निर्णय नं याःगु दु ।
राष्ट्रपतिया पलाः बिरुद्ध सर्वोच्च अदालतय् मुद्दा तयेगु बारे नं सहलह यायेत थौं सुथंनिसें वालुवाटारय् महा-न्यायाधिवक्ता नापं थीथी कानून व्यवसायीत च्वनाः बिचाः ब्याकाच्वंगु दु । थुकिया नापनापं राष्ट्रपतिया पलाः असंवैधानिक खः धासें आः माओवादीं सदन व सतक निगुलिं थासय् आन्दोलनयात तीव्रता बीगु निर्णय नं याःगु दु ।
उखे प्रधानसेनापतियात चीकेगु निर्णयया विरोधय् सरकारपाखें पिहां वःगु नेकपा एमाले संसदीय दलया बैठकं नं राष्ट्रपति डा. रामवरण यादवं ल्ह्वंगु पलाः असंवैधानिक धकाः निर्णय याःगु दु । प्रधानसेनापति चीकेगु सरकारया निर्णय पाय्छि मजू थें उकिया पनेगु राष्ट्रपतिया पलाः नं संवैधानिक मजूगु निष्कर्ष एमाले संसदीय दलया थौं सुथय् च्वंगु बैठकं पिकाःगु खः ।
राष्ट्रपति यादवया थ्व पलाःयात पाय्छि धकाः निष्कर्ष पिकाःगु पार्टी धाःसा भाजु यादवया थःगु हे नेपाली कांग्रेस छगू जक जूगु दु । थौं च्वंगु कांग्रेस बैठकं राष्ट्रपतिया पलाःयात लसकुस यासें प्रधानमन्त्री पुष्पकमल दाहालयात राजीनामा बीत नं इनाप याःगु दु ।
थ्वहे झ्वलय् थम्हं ल्ह्वनागु पलाःयात कयाः विवाद वयेवं राष्ट्रपति यादवं नं थौं देशवासीया नामय् छगू सन्देश जारी यायेगु तयारी यानाच्वंगु खँ सूत्रं धाःगु दु ।
