अष्ट्रेलियाली नगरत स्वापू विहीन
अष्ट्रेलिया (एएफपी)
थ्यंमथ्यं न्हय्न्याद्वः नागरिकत बासोबास यानाः वयाच्वंगु छगू अष्ट्रेलियाली नगर रकह्याम्पटन सोमवाःबहनीनिसें तच्वःगु चलःया हुनिं स्वापू विहीन जूगु दु । अष्ट्रेलियाय् वंगु वाःनिसें वःगु तच्वयेक वःगु वां यानाः चलःया हुनिं दर्जनौं तःधंगु शहरत प्रभावित जूगुलिं थुगु नगरयात स्वाइगु फुक्क लँपुत लखं चुइकूगुलिं यातायात स्वापूया विच्छेद जूगु दु । रकह्याम्पटन नगरदुने नं चलः वनेधुंकाः विषालु सर्प व गोहीतय्सं सास्ती यायेवं नगर अधिकारीतय्सं आपालंं नागरिकतय्त मेमेथाय् चीकेत बाध्य जूगु व हिंस्रक जीवतपाखें म्वायेत सचेत याःगु दु ।
नगरया मध्य भाग जुयाः वनीगु फिजरोय खुसिइ लःया सतह अप्वलय् स्वीगू फिटतक्क थ्यंगु व बुधवाः वा विहीवाःतक्कयादुने अझ अप्वः स्वीस्वंगू, स्वीप्यंगू फिटतक्क थ्यनीगु धुकूमाः याःगु दु । लःया हुनिं निसः गू धइथे भवन बांमलाक्क प्रभावित जूगु व नगरदुने नं सर्वत्र यातायात पंगः जूगु दु । रकह्याम्पटन नगर बि्रस्बेन महानगरपाखें न्यासः किलोमिटर ताःपाक्क लाः । थ्व नगर कृषिजन्य उत्पादन लिसे कोइलाखानीया भण्डारयारुपं म्हस्यू । छवालं मयाक अष्ट्रेलियाय् तच्वयेक वःगु मुसलधारे वा व सामयिक हिमवायु "तासा" या प्रभावं फुक्क खुसिइ चलः वयाः खनिज उत्पादन कृषि फारामयात बांमलाक्क प्रभाव लाकेगुया लिसलिसे आपालं ल्याखय् तां, लँपु चुइकूगु व उद्दारया नितिं तःधंगु ल्याखय् सेना व हेलिकोप्टर नापं परिचालन याःगु दु । प्रभावित अष्ट्रेलियायात अमेरिकां याकनं मानवीय ग्वाहालि ब्यूगु व अमेरिकी विदेशमन्त्रीं अनया धनजनय् जूगु क्षतिया खँय् दुःख प्वंकूगु दु ।
More Stories Like this
दक्षिणी अफगानिस्तानय् नीम्ह तालिवानपाखें आत्मसमर्पण भारतया उडिसाय् चलखं झिंखुम्ह सित अमेरिका व बेलायतया गुप्तचर एजेन्सीया गद्दाफीलिसे साँठगाँठ रुसं सिरीयाया चिकं मन्यायेगु विषययात कयाः कुंखिन जापानय् न्ह्यगू दशमलव छगू रेक्टरया भुखाय्
