अन्तरकलेज बास्केटबल कासाय् प्राइमया प्रतिद्वन्द्वी ह्वाइटहाउस

येँ (झीगु स्वनिगः)

च्याक्वःगु प्राइम कप अन्तर कलेज बास्केटबल धेंधेंबल्लाः कासाया गल्र्सया उपाधीया नितिं ग्वसाः खलः प्राइमं डिफेन्डिङ च्याम्पियन ह्वाइटहाउसलिसे ल्वाइगु जूगु दु । गल्र्सया राउन्ड रविन लिग अन्तर्गतया कासाय् म्हिगः प्राइमं रातो बंगलायात ३८ - १४ पाखें बुकाः ह्वाइटहाउसलिसे उपाधी पक्का यायेत ताःलाःगु खः । रातो बंगलाया उपलब्धि धायेगु हे प्राइमयात स्वंगूगु क्वाटरय् ४ - ४ या बराबरीइ दिकूगु खः । मेमेगु क्वाटर प्राइमं थःगु पक्षय् लाकूगु खः । प्राइमं न्हापां १४ - ६, निगुलिइ ८ - ० व प्यंगुलिइ १४ - ४ अंक काःगु खः । उमित त्याकेगु नितिं नेहा मास्कें १५ अंकया योगदान ब्यूगु खः । सोमबाः हे फाइनलय् थाय् काःगु ह्वाइटहाउस व प्राइम निगुलिं नं छगू - छगू कासा म्हिते ल्यं दनि । उकिया लिच्वलं राउण्ड रविन्ड लिगया शीर्ष टोली क्वःछुइ । ब्वाइजपाखे नं ग्वसाः खलः प्राइम फाइनलय् थ्यन । नयाँ बजारस्थित घरेलु कोर्टय् प्राइमं टि्रनिटीया यात्रा ५७ - ४३ ल्याखं पूर्णविराम याःगु खः ।

शुरुवातया स्वंगू क्वाटरय् प्राइमं छसीकथं १९ - ५, १६ - ८ व १४ - १० या अग्रता प्राप्त याःगु खः । प्यंगूगु क्वाटर टि्रनिटीं २० - ८ ल्याखं कब्जा याःसां नं त्याकेगु नितिं पर्याप्त जुइमफूगु खः । प्राइमया एलेन केसीं उत्कृष्ट प्रदर्शन यानाः २४ अंक काःगु खः । फाइनलय् प्राइमं नेशनल व ह्वाइटहाउसं त्याकूगु टीमलिसे म्हिती ।

More Stories Like this