सुडान घोटालाया मन्त्रीपरिषदय् मतभेद
येँ (झीगु स्वनिगः)
सुडानया डार्फरय् ज्या यानाच्वंगु शान्ति मिसनय् वंपिं नेपाल प्रहरीया पुचःयात छ्वःगु बन्दोबस्तया ज्वलनय् आपालं घोटाला जूगु खँय् मन्त्रि परिषद बैठकय् सहलह जूगु दु । युद्धक्षेत्रय् माःगु इपिसि लगायतया ज्वलं मदयाः अयोग्य जूगु नेपाल प्रहरीयात न्हूगु ज्वलं छ्वयेगु वा मछ्वयेगु धइगु खँय् मन्त्रीतदथुइ कचवं ब्वलंगु खः । न्हूगु ज्वलं छ्वयेगु वा मछ्वयेगुबारे मन्त्री परिषदय् हे मतभेद ब्वलनेवं प्रधानमन्त्रीया सरकारी निवास बालुवाटारय् म्हिगः च्वंगु मन्त्रीपरिषद बैठक स्थगित याःगु दु । बैठकलिपा सञ्चारकःपिंलिसे खँल्हानादिसें सञ्चारमन्त्री लिसे सरकारया प्रवक्ता शङ्कर पोख्रेलं शान्ति मिसनय् वंगु नेपाल प्रहरीयात न्हूगु ज्वलं छ्वयेगु बिषयलय् सहलह जुयाच्वंगु जानकारी बियादीगु खःसा समितिं शान्ति मिसनया नितिं गुणस्तरहीन ज्वलं न्यानाः आर्थिक अनियमितता जूगु लिच्वः पिकयादिसें तत्कालीन गृहमन्त्री कृष्णप्रसाद सिटौला, तत्कालीन गृह छ्याञ्जे उमेश मैनाली लगायतया प्रहरी अधिकृततय्त कारबाहीया दायराय् हयेत सरकारयात सिफारिस याःगु दु ।
सरकारं म्हो गुणस्तरया व अप्रयाप्त ज्वलं छ्वःबलय् नेपाःया अन्तर्राष्ट्रिय बेइज्जत जूगु समितिया दाबी दु । सरकारं गुणस्तरीय व पर्याप्त ज्वलं छ्वयेधुंकाः शान्ति मिसनया नितिं डार्फरय् वंपिं नेपाल प्रहरीयात संयुक्त राष्ट्रसंघं लिछ्वयेगु तयारी नापं यानाच्वंगु दु ।
