थँवहिसं सुचुपिचु याइगु
येँ (झीगु स्वनिगः)
पर्यटन दँ २०११ यात ताःलाकेत थनया २९ वडा स्थित सञ्चयकोष भवनया न्ह्यःने कन्हय् सुथय् छगू विशेष सुचुपिचु ज्याझ्वः न्ह्याकेत्यंगु दु । येँ महानगरपालिकाया २९ वडा व ठमेल पर्यटन विकास परिषद्या मंकाः ग्वसालय् उखुन्हु उगु लागाया नितिं ४० गः गार्वेज बीन इनीगु व प्रचारात्मक ज्याझ्वः कथं ह्याण्ड बिल नं इनीगु खँ वडा छ्याञ्जे सुमन अधिकारीं जानकारी बियादीगु दु ।
अथेहे, वंगु आइतवाः निसें पर्यटक केन्द्रकथं नांजाःगु थँवहि लागाय् मंगाः सफा यायेगु ज्याझ्वः न्ह्याकूगु दु । ठमेल पर्यटन विकास परिषद्या दुजः प्रकाश नरसिंह राणाया कुतलय् जूगु मंगाः सफा यायेगु ज्याझ्वलय् स्थानीय मनूत, महानगरया वडा कर्मचारीत नापं महानगरपालिकां जेट गाडीया व्यवस्था यानाः ग्वाहालि याःगु खः । थथे मंगाः सफा यायेगु झ्वलय् सवारी साधनयात व्यवस्थित यायेगु नितिं ट्राफिक प्रहरीं ग्वाहालि याःगु खः । थौंकन्हय् उगु लागाय् छेँ दंम्ह चिरिञ्जिवी भट्टं धलय् लः वांछ्वयेगु नामय् ध्याचः मंगालय् छ्वगुलिं स्थानीय मनूतय्सं उम्ह भट्ट खनाः आक्रोषित जूगु खः । सम्वादाता : सानुकाजी
