तरकारी खेतीपाखे आकर्षण अप्वल

ख्वप (झीगु स्वनिगः)

उमेरं झन्डै न्हय्गू दशक थ्यनेत्यंम्ह रामप्यारी दुवालयात गुम्हसिया परिवार लहीगु नितिं लिमलाः फमलाः जुयाच्वंगु दु । उमेरं छ्यनय् च्वंगु सँ फुक्क तुइसे च्वनेधुंकूगु दु तर नं वयात छत्तिं हे बुरी जुइधुंकूगु महशुसं थ्यूगु मदुनि । सत्तरी दँ थ्यनेत प्यला जक ल्यं दनीम्ह रामप्यारीयात तरकारी उत्पादनय् लिमलाः फमलाः जुयाच्वंगु दु । स्वीनिदँनिसें सञ्चालन यानाः वयाच्वंगु तरकारी व्यवसायया ताःहाकःगु अनुभव न्यंकूसें जिन्दगी तरकारी व्यवसायलय् हे बीगु वय्कःया धापू दु । शुरु याःसांनिसें बालं कयातःगु जग्गाय् तरकारी पीत बाध्य जूगु वय्कलं धयादिल । वय्कलं वंगु स्वंगू दशकनिसें झिगू रोपनी जग्गा बालं कयाः तरकारी व्यवसाय सञ्चालन यानाः वयाच्वंगु दु । ख्वपया सिपाडोल लिक्कया सुन्दरवस्तीइ स्थायी बसोबास यानाः वयाच्वंम्ह दुवालं दच्छिइ छगू रोपनीया झिंनिद्वःया भावं बाः पुलाः वय्कलं उगु व्यवसाय यानाः वयाच्वंगु खः । वय्कलं काउली, आलु, भान्टा, गोलभेरा, सिमि, प्याज, चसू पलः, गाजर लगायत दर्जनौं स्वयाः आपालं तरकारी उत्पादन यानाः वयाच्वंगु दु ।

तरकारी व्यवसायपाखें जक दच्छिया न्हय्गू लाख तका धेबा कमय् यानाः वयाच्वंम्ह दुवालं अझ तरकारीया भाः थहाँवंगुलिं झन् अप्वः लय्ताःगु दु । थःम्हं पिनागु तरकारी कायेगु नितिं कालमति, बनेपा व धुलिखेलपाखें व्यवसायीत न्हियान्हिथं थःगु हे बुँइ वयेगु यानाच्वंगु वय्कलं धयादिल । वय्कःयात सुन्दरवस्तीइ तरकारीया महारानी धकाः नापं म्हस्यू । तरकारी खेतीया फुक्क ज्ञान दुगुलिं उगु थाय्या आपालं किसानतय्त तालिम नापं बिइकेगु नितिं वय्कःयात धइगु स्थानीय किसानतय्सं धाःगु दु । तरकारी व्यवसाय यानाः परिवार लहिनाः वयाच्वंम्ह दुवालं सिपाडोलय् छेँ नापं दयेके धुंकूगु दु । छेय् छुइपिंत कलेजय् अध्ययन यायेत खर्च नापं बियाः वयाच्वंम्ह दुवालं काय् भौपिंत नापं बुँइ हे रोजगार बियाः वयाच्वंगु दु । खेतीयात हे रोजगारीया रूपं कःघानाः वयाच्वंपिं वयाः काय् भौपिं तसकं लसतालिसे धयादी - धेबा कमय् यायेत ताःपाक्क वनेम्वाः । थःगु हे थासय् मेहनत याःसा गाक्कं धेबा कमय् यायेफु ।

दुवालं थें हे थन जग्गा बालं कयाः तरकारी खेती यायेगु नितिं लहर न्ह्याःगु दु । वंगु न्हय्दँ न्ह्यःनिसें तरकारी व्यवसाय सञ्चालन यानाः वयाच्वंगु कुमार ख्याजुया नुगः खँ नं दुवालया स्वयाः ब्यागलं दु । तरकारी व्यवसायलय् खप्पीस ख्याजु दच्छिया झिगू लाख तका तक कमय् यानाःगु धयादिल । थ्व इलय् ख्वपया कटुञ्जे, सूर्यबिनायक, कमलबिनायक लगायतया थासय् जग्गा बालं कयाः तरकारी व्यवसाय याइपिनिगु धेंधेंबल्लाः हे जूगु दु । उमिगु तरकारी व्यवसायं बजारय् थहाँ वनाच्वंगु तरकारीया भाः नियन्त्रण यायेत च्वछायेबहःगु भूमिका मम्हीति धकाः धायेमफू । किसानतय्गु नितिं न्हूगु व उन्नतकथंया पुसा विकासय् सरकारं धाःसा ग्वाहालि यायेमाःगु खनेदु ।

More Stories Like this