२० वडा सुधार समितिया औचित्य

- अमीर ताम्रकार

येँ महानगरपालिकाया २० वडा धयागु मरु, अटकोनारां चिकंमू, जैशीदेगः, कोहिति, भिन्द्यःत्वाः, इलाछेँ, मरु छ्वासपाः, रामघाट, ख्यःकेव व मरुहिति इलाका लाः । थ्व वडायात १९, १४, २१, २२, २३ लगायत वडा नाप स्वाना च्वंगु दु । थुगु वडा दुने मरुसतः -काष्ठमण्डप), मरु सिंहसतः लगायत धार्मिक व ऐतिहासिक रुपं तसकं महत्वपूर्ण सम्पदात नं थनहे लानाच्वंगु दु । काठमाडौं धयागु नां थनयागु काष्ठमण्डप अर्थात मरुसतलं वःगु नां खः । काष्ठमण्डपया नामं काठमाडौं धाःगु खः । येँया लाय्कू, हलुमान ध्वाखा लालवैठक, कुमारी छेँ, गणेद्यः, भिन्द्यः, दश अवतार देगः लगायत ऐतिहासिक थाय्बाय्त दुगु नातां २० वडा छगू तसकं महत्वपूर्ण थाय् जुयाच्वंगु दु । तर विडम्वनाया खँ छु धाःसा थुज्वःगु सम्पदाया सम्पदां जाःगु थुगु २० वडा थौं लथालिङ्ग व भताभुङ्ग जुयाच्वंगु दु । यदि थुकियात भचा माःकथं व्यवस्थित यायेमफुत धाःसा थ्व २० वडा कालान्तरय् वनाः लथालिङ्ग जुइगु निश्चित खनेदु ।

२० वडाया केन्द्र विन्दु जुयावयाच्वंगु मरुत्वाः सांस्कृतिक नखः चखलय् नं तःधंगु महत्व व भूमिका ल्यना च्वन । येँयाः खुन्हु अप्वः यासे अप्वः नखः थन न्यायेकी, साय्मितय्गु बौमत, छिपातय्गु लाखय्, तवःतय्गु दागिं वनेगु लगायत सास्कृतिक प्याखंत नं थ्वहे वडाय् लानाच्वंगु दु । अथ्य धयागु सकल वडा वासीपिनिगु नितिं तःधंगु गर्भया खँ खः । न्हापा न्हापा सिंहसतः क्वय् पसः तयातःथें मरुसतः छचांलिं पसःत तया तःगु खः । लिपा १८ सालपाखे मरु सतः दयेकेगु झ्वलय् उगु पसः दक्कों चीकाः खुल्ला यानाविल । थुगुहे कथं खुल्ला यायेमाःगु दु - सिंह सतः छचाःलिं । तर थ्व ज्या न्ह्याकेफूगु मदुनि । थ्व वाहेक मरुत्वाःया छ्वासपाः कुहां वनेथाय् ऐतिहासिक लुँकुफल्चा दु । शंखधर साख्वाःया इतिहास नाप थ्व फल्चा स्वानाच्वंगु दु । धाइ, ख्वपया नांदम्ह ज्योतिष सिद्धिवन्तं साइत स्वयाः विष्णुमतिया दोभान लखुतीथेंय् प्यम्ह भरियातय्त फि कायेकेहःगु उगु फि कयाः भरियातय्सं उगु लुँकुफल्चाय् दिकाःझासू लना च्वंगु इलय्हे शंखधरं उगु सुवर्णसाइटया प्यकु फिं शंखधरं थःगु छेँय् यंकूगु धाइ ।

उकिं उगु फल्चाया ऐतिहासिक मू दु । छु दँ न्ह्यः तक्क थ्व फल्चाया नामनिसान तक्क मदये धुंकूगु खः । छुँ दँ न्ह्यः जक येँ महानगर पालिकाया आर्थिक ग्वाहालिं उगु फल्चा हानं घस्वाके धुकागु दु, थ्व खँ थनया सकल जनतां खँगु व स्यूगुहे जुइमाः । स्वंगूत्या लाखं उगु फल्चा धस्वाःगु खः । मरुत्वाःया दथ्वी लाक्कक लानाच्वंगु सिंहसतः खास थुकिया नां सिँल्यंसतः खः । छमाहे सिमां दयेकूगु मरुसतः दयेकाः ल्यंगुसिं दयेकूगु धाइ । न्हापा उगु सतःया प्यख्यरं प्यम्ह सिहं मदु । लिपा जक सिँल्यं सतःया प्यख्यकुनय् प्यम्ह लीया सिंहत तयेवं सिँल्यं सतःया अपभ्रस जुयाः सिंहसतः जूवंगु खः धाइ । थ्व सतःया छचाःलिं पसः तयातःगु दु । गुथि संस्थानयात बाहाः पुलाः न्यागू-खूगु दशक न्ह्यः निसेंया मनूतय्सं पसः तयावयाच्वंगुलि नं गुलिस्यां पसः कयातःसां थःपिसं मतसे बाहाः कयाः पसःतयेकाः वयाच्वंगु दु । तर थौं वयाः उगु सिंहसतः दुनावनीगु तरखरय् दु । सिंह सतःया पौ ज्वःगु जक मखु, सतःया थाय् थासय् भ्वाथः जुयाः ग्यानापुगु अवस्थय् दु । तर गुथि संस्थानं दयेकेगु ज्या याःगु मदु । अधिकारनामा हस्तान्तरण मजूगुलिं बजेट फ्यानाः दयेकेफुम्ह महानगरपालिकां ल्हाःमतः । सतः भ्वाथः जूगु व वावइ बलय् दुने, च्वतय् थाय्थासय् ज्वयाः पाताः जुइगु अवस्थय् दु । न्हापा बहनी बहनी भजन जुइ, सुथय् सुथय् थुगु सतःया कृष्णद्यःयात पुज्याइगु नं याः । तर थौं उगु सतः भजनदर्शणया स्थितिइ ल्यनेवं द्यः पुज्यायेगु नं वन्द, भजन हालीपिंनं व्यपत्ता । मात्रै सत्तः दु थहां क्वहां वा दुहां पिहां वनेगुहे बन्द । ...........कथहं

More Stories Like this