राष्ट्रपतियात सकृय यायेगु खँ गलत

लोकतान्त्रिक परिपाटी व प्रकृयाकथं न्ह्याःवनाच्वंगु शासन व्यवस्थाय् विस्तारवादी भारतया नाङ्गो हस्तक्षेप अले राष्ट्रपतियात सकृय यानाः संविधानसभाय् दकले तःधंगु दल माओवादीया नेतृत्वया सरकारयात राजिनामा बीत वाध्य याकूगुयाहे लिच्वः थौं नेपाःमि जनतां भोगय् यायेमालाच्वंगु शत्य खः । यदि अवले सरकारी निर्णययात पल्टय् यायेत चांचां राष्ट्रपतिया छेँय् वनाः खापा सकः मवंगु जूसा थौं राजनीतिक गतिरोधं देश अनिर्णय वन्दि मजुइगु खइ । भारतया नाङ्गो हस्तक्षेपया न्हयःने लम्पसार जुया हलुमान जुइत स्वयेवं संसदीय राजनीतिक दलतय्गु हैसियत व प्रवृत्तियात नेपाःमि जनता उलि घृणा व अविश्वास मयाइगु खइ । निश्चित रुपं राजनीतिक दलतय्गु दथ्वी समस्या दु, अविश्वास दु, शंखा व उपशंखा दु । थुकिया ल्यूने विस्तारवादी भारत दनाच्वंगु दु धयागु खँ लोमंके मज्यू । आः वयाः उगु मू खँयात लोमंकाः हानं राष्ट्रपतियात हारग्वार काःवनेगु ज्या बांलाःगु खँ मखु । निश्चितरुपं संविधानया संरक्षक राष्ट्र प्रमुखया नातां राष्ट्रपति जुइफु । थुकिया अर्थ राष्ट्रपतियात सकृय यायेगु खँ जुइमखु । नेपाःया अन्तरिम संविधानय् राष्ट्रपतियात सकृय जुइगु अधिकार वियातःगु हे मदु । अधिकार मदयेक सकृय यायेत स्वयेगु धयागु विधान विपरित खँ खः । कानूनतः वियामतःगु अधिकार छय्लेगु धयागु देशयात कानूनी राज्य दयेकेगु पल्सा दण्डहिनता व गैरकानुनी संस्कृतियात हःपाः व लिधँसा बीगु खः ।

थ्व व थुगु सामान्य खँयात देशया उप राष्ट्रपति थें मर्यादित व सम्मानजनक धयागु तसकं दुःखद् व विडम्वनापूर्ण खँ खः । सहमतिया राजनीति न्ह्याः वनाच्वंगु मदु, वंगु खुलांनिसें संविधानसभां प्रधानमन्त्री छम्हहे ल्यये फयाच्वंगु मदु । थुकिया कारण झी जःलाखःला देय् भारत खः । भारतया नाङ्गो हस्तक्षेप व उकिया न्ह्यःने लम्पसार परे जुयाः थम्सः पानाजुपिं कांग्रेस-एमालेथें हलुमानतय्सं यानाः खः । राष्ट्रपतियात सकृय जुइमाल धकाः सल्लाह वीत हत्थाय् चायाच्वंम्ह उपराष्ट्रपति झानं धात्थेंहे वर्तमान राजनीतिक समस्या ज्यंकेगु धयागु खःसा नेपालय् भारतं हस्तक्षेप यायेगु ज्या तत्काल दिकेमाः धकाः धायेफु, धायेमाः । अधिकारहे वियामतयेकं राष्ट्रपतियात सकृय जुइमाल, राजनीतिइ हस्तक्षेप यायेमाल धायेगु गलत खः । थुकिं ला राजनीतिक अवरोध चीकेगु पल्सा झन जक अप्वयेकेगु ज्या याइ । कानूनतः व्यवस्था जूकथं जक ज्या यायेगु व याकेगु खः । राष्ट्रपतियात सल्लाह वियाः उपराष्ट्रपतिं ला थःयात भिंम्ह धायेकेत स्वःगुला खहे खत, तर भिंम्ह जुइत न्ह्यःने लाःथे सल्लाह वियाः मखु सत्य व तथ्य नवायेगु आँट यायेमाः । विस्तारवादी भारतया विरोध यायेमाः । संविधान विपरित सल्लाह वियाः निकास पिहां मवइगु खँया जानकारी उपराष्ट्रपतियाके दहेमाः ।

More Stories Like this