बलात्कार याःगु द्वपनय् भारतीय सांसदया हत्या
येँ (झीगु स्वनिगः)
भारत विहारया पूणर्ीया धैगु जिल्लाया सांसद राजकिशोर केसरीयात म्हिगः मंगलवाः बलात्कार याःगु धकाः छम्ह मिसां छुरां सुयाः स्यानाब्युगु दु । स्थानीय शिक्षिका रुपम पाठकं भारतीय जनता पार्टीया सांसद केसरीयात थःगु निर्वाचन क्षेत्रय् बैठकय् हे सहभागी जुयाच्वंगु इलय् सकस्यां खंक हे प्वाथय् छुरां सुयाः स्यानाब्यूगु खः ।
५१ दँ दुम्ह सांसदं थःत स्वदँ न्ह्यःनिसें लगातार बलात्कार यानाः वयाच्वंगु खः धकाः शिक्षिका पाठकं प्रहरीयात बयान ब्यूगु दु । अथे छुरांसुयाः गम्भीर घाःपाः जूम्ह सांसद केसरीयात वासः याकेत अस्पतालय् यंकूगु खःसा अस्पतालय् थ्यनेवं हे सित धकाः चिकित्सकतय्सं घोषणा याःगु खः । उगु घटना जुइवं सांसदया कार्यकर्तातय्सं मिसायात दायाः गम्भीर घाःपाः नं यानाब्यूगु खः ।
