उपप्रधानमन्त्रीं घुस नयेत ख्याच्वः बिउगु खुलासा

येँ (झीगु स्वनिगः)

वर्तमान कामचलाउ सरकारया उपप्रधानमन्त्री विजयकुमार गच्छेदारं नेपाल वायुसेवा निगमयात एअरबसया विमान न्यायेगु सम्झौताय् समर्थन यायेत सार्वजनिक लेखा समितिया दुजःतय्त घुस बिइगु कुतः याःगु विकिलिक्स दस्तावेज पाखें खुलासा जूगु दु । कामचलाउ सरकारया उपप्रधानमन्त्री गच्छेदारं एअरबस सम्झौता मजुल धाःसा सरकारं थःगु पार्टी मधेसी जनअधिकार फोरम लोकतान्त्रिक पार्टी पिहां वनेगु जुइ धकाः प्रधानमन्त्री माधव कुमार नेपालयात तकं ख्याच्वः ब्यूगु खुलासा जूगु दु । येँय् च्वंगु अमेरिकी दूतावासया तत्कालीन प्रमुख डोनाल्ड ए क्याम्पं वंगु दँया वर्षया फेबु्रअरी २४ सं वासिङटनय् छ्वःगु केबलय् सार्वजनिक लेखा समितिया निकट सूत्रया हवाला बियाः अथे खुलासा याःगु खः ।

अमेरिकी विमान कम्पनी बोइङ व प|mान्सय् प्रधान कार्यालय दुगु युरोपेली विमान कम्पनी एअरबसया दथुइ थःथःगु उत्पादन मिइगु तीब्र प्रतिस्पर्धा जुइ । उगु हे झ्वलय् अमेरिकी कुटनीतिकज्ञतय्सं गुगु कथं बोइङ न्यायेत उगु कम्पनीया नितिं मार्केटिङ एजेन्ट थें जुयाः सरकार प्रमुख व एअरलाइन्स कम्पनीतय्त दबाव व प्रलोभन बिइगु धैगु खँय् विश्वया थीथी देय्या दूतावासतपाखें जारी जूगु केबलत सार्वजनिक यायेगु झ्वलय् येँया दुतावातपाखें अथे जारी याःगु केबलत नं लाःगु दु धकाः न्ह्यथनातःगु दु ।

सार्वजनिक याःगु केबलय् दूतावासं अर्थ सचिव रामेश्वर खनालनाप खँल्हाबल्हापाखें जानकारी वःगु धकाः न्ह्यथनातःगु दु ।
अमेरिकी कुटनीतिज्ञतय्गु हस्तक्षेप व दबाबलिपा खनालं अएर बसया विमान न्यायेगु नितिं ध्यबा बिइत अर्थ मन्त्रालयपाखें अस्वीकार याःगु व उकिंयाना अमेरिकी विमान कम्पनी बोइङया विमान न्याइगु संभावाना अप्वयाः वःगु दस्ताबेजय् न्ह्यथनातःगु दु ।
केबलय् प्रधानमन्त्री ज्याकूया स्रोतपाखें प्राप्त जूगु धकाः युरोपेली मुलुकतय् कुटनीतिज्ञतय्त प्रधानमन्त्री माधवकुमार नेपालयात एअरबस न्यायेत कडा शब्दं च्वयातःगु पौ तकं व्यहोराय् दुथ्याकातःगु दु । थुगु कथंया खुलासा न्युयोर्क टाइम्सं सोमवाः जक सार्वजनिक याःगु खः ।