माओवादी बैठकय् सहलह जारी
येँ (झीगु स्वनिगः)
एकीकृत नेकपा माओवादी केन्द्रीय समितिया निन्हुया दिंया बैठकय् पार्टी नायः प्रचण्डपाखें न्ह्यब्वःगु परिमार्जित राजनीतिक लिसे संगठनात्मक प्रस्ताव व अन्तर्संघर्ष सम्बन्धी न्यागू बुँदे प्रस्तावय् केन्द्रीय दुजःतय्सं थःगु बिचाः तःगु दु । म्हिगःया वैठकय् पोलिटव्यूरो व केन्द्रीय समिति दुजलं थःथःगु बिचाः प्वंकूगु खः । वैठकय् पार्टी न्वकु डा. बाबुराम भट्टराईं धाःसा लिखितरुपं ब्यागलं मत न्ह्यब्वःगु प्रबक्ता दीनानाथ शर्मां जानकारी बियादीगु दु । भट्टराईं मू अन्तरविरोध, कार्यदिशा व लाइनय् ब्यागलं मत न्ह्यब्वःगु स्रोतं जानकारी ब्यूगु दु ।
पार्टी नायःपाखें न्ह्यब्वःगु कार्यविभाजनया प्रस्तावय् तप्यंक हे कार्यक्षेत्र क्वःमछ्यूसे नीतिगतरुपं कार्यविभाजन सम्वन्धी अवधारणा हःगु व उकिइ केन्द्रीय समितिपाखे सुझावलिपा जक कार्यविभाजनया क्वःछीगु जानकारी ब्यूगु दु । थ्वहे दथुइ अनमिनं प्रमाणित याःगु ल्वाभः लःल्हायेत सरकारं ब्यूगु निर्देशनया माओवादीं खण्डन याःगु दु । माओवादी मू ज्याकू पेरिसडाँडाय् सञ्चारकःमिपिंलिसे खँल्हानादिसें माओवादी प्रबक्ता दीनानाथ शर्मां बर्तमान कामचलाउ सरकारयात अज्याःगु अधिकार मदुगु लिसे सरकारी प्रस्ताव संविधान अःखः जूगु स्पष्ट यानादीगु खः ।
