‘सेना समायोजन मजूतले ल्वाभः लःल्हायेगु जुइमखु’

येँ (झीगु स्वनिगः)

एकीकृत नेकपा -माओवादी)या छ्याञ्जे सीपी गजुरेलं सेना समायोजन मजूतले तक गुगु नं हालतय् वर्तमान कामचलाउ सरकारं धाःथें ल्वाभः लःल्हायेगु जुइमखु धकाः धयादीगु दु । म्हिगः मंगलवाः येँय् ग्वसाःग्वःगु छगू ज्याझ्वलय् न्वंवायेगु झ्वलय् वय्कलं अथे धयादीगु खः । एकीकृत माओवादीया नेता गजुरेलं धयादिल 'छगू प्रक्रियाय् थ्यंकाः जक ल्वाभः लःल्हायेगु जुइ, छुं नं रोडम्याप मदयेकं माओवादीं ल्वाभः लःल्हायेगु जुइमखु ।'

अनमिनया म्याद थप यायेगु विषयसं संवैधानिक जूगु दावीयासें वय्कलं राजनीतिक सहमति मजुल धाःसा अनमिनया सवालय् थःपिं सर्वोच्च अदालतय् वनेगु जुइ धकाः नं धयादिल । न्हूगु सरकार निर्माणय् थःपिनिगु दलं नं नेतृत्वया दावी यानाच्वंगु दु धयादिसें माओवादीया नेता गजुरेलं पार्टी दुनें नायः पुष्पकमल दाहाल प्रचण्ड व न्वकु डा. बाबुराम भट्टराई बाहेकया नेतात नं नेतृत्वय् वयेफु धकाः नं धयादिल । वय्कलं धयादिल 'आः एकीकृत माओवादीं एमालेया नायः झलनाथ खनालयात समर्थन यायेगु बाय् सुयात उम्मेदवारी बिइगु धैगु विषयसं निर्णय जूगु मदु ।' माओवादी पार्टीं आःया अवस्थाय् मेमेपिं नं प्रधानमन्त्रीया नितिं मालेफु धकाः माओवादीया नेता गजुरेलं धयादिल ।