'उम्मेदवारी लितमकाःसा विपक्षय् मतदान’

येँ (झीगु स्वनिगः)

वर्तमान सरकारया नेतृत्व यानाच्वंगु नेकपा -एमाले)या छ्याञ्जे युवराज ज्ञवालीं नेपाली कांग्रेसया रामचन्द्र पौडेलया प्रधानमन्त्री उम्मेदवार लितमकाल धाःसा थःपिन्सं व्यवस्थापिका संसदया संसदय् विपक्षय् मतदान यायेगु जुइ धकाः ख्याच्वः बियादीगु दु । म्हिगः मंगलवाः जनकपुरय् पत्रकार सम्मेलनय् पत्रकारतय्सं न्यंगु न्ह्यसःया लिसः बिइगु झ्वलय् वय्कलं अथे धयादीगु खः । एमालेया नेता ज्ञवालीं धयादिल 'गबले नं त्याः बू मजुइगु प्रतिस्पर्धापाखें व्यागलं जुयाः रामचन्द्र पौडेलं मुलुकयात निकास बिइमाः, वय्कलं प्रतिस्पर्धां ब्यागलं मजुल धाःसा जिमिसं विपक्षय् मतदान यायेगु जुइ ।'

मूमू स्वंगू राजनीतिक दल एकीकृत माओवादी, नेपाली कांग्रेस व एमालेया दथुइ सहमति मजुल धाःसा शान्ति व संविधान निर्माण यायेफैगु अवस्था मदु धकाः नं एमालेया नेता ज्ञवालीं दावी यानादिल । एमालेया केन्द्रीय सचिव वय्कलं धयादिल 'उकिं हे एमालें निरन्तर रुपं सहमतिया सरकारयात हे दक्ले अप्वः प्राथमिकता बियाच्वंगु खः । व्यवस्थापिका संसदीय दकले ततःधंगु स्वंगू दल मिलेजुल धाःसा क्वःछिनातःगु ई जेष्ठ १४ गतेया दुने न्हूगु संविधान दयेकेफै धकाः नेता ज्ञवालीं दावी नं यानादिल ।
वइगु २५ गतेनिसें व्यवस्थापिका संसदया नियमित अधिवेशन न्ह्याइगु जूगु दु ।

व्यवस्थापिका संसदय् प्रधानमन्त्रीया चुनावया सवालय् एमाले दुने निगू मत दुसां लिपांगु इलय् वयाः एमाले आः प्रधानमन्त्रीया चुनावय् विपक्षय् वनेगु जुइ धकाः धयाच्वंगु खः । व्यवस्थापिका संसदया आः जुइगु उगु अधिवेशन न्हूम्ह प्रधानमन्त्री ल्ययेगु नापं मेमेगु विषयसं सहलह जुइ ।