तुया भाः थकायेत किसानतय् आन्दोलन
तुया भाः थकायेमाःगु माग यासें सर्लाही, नवलपरासीया किसानत आन्दोलित जूगु दु। न्ह्याबलें नं किसानतय्त लथ्यानाः दथुइ च्वनीपिं दलाल व व्यापारीतय्त जक पोसे यायेगु सरकारी नीति विरुद्ध स्थानीय किसानतय्सं याःगु थ्व विद्रोह खः धाःसां जिउ। तर राज्यं धाःसा उमिगु सः न्यनेगु सिबें नं उमित दमन याना छ्वयेगु नीति ज्वंगुलिं थुकिं आन्दोलनयात अझ तच्वयेका बीगु खतरा पिकयाच्वंगु दु ।
खतुं किसानतय्सं माग याः थें तुया भाः थकाल धाःसा उकिया लिच्वः कथं तुरुन्त हे चिनीया भाः थहां वनेधुंकी। तर नेपालय् सरकारं चिनीया भाः वःक्वःमछि थकायेधुंकूसां नं तुया भाः धाःसा थकाःगु मदुनि। चिनीइ थहां वंगु भाःया लबः फुक्क दथुइ च्वंपिं व्यापारीतय्सं नयेगु याइ। सरकार दुथ्याःपिं व दुमथ्याःपिं राजनीतिक पार्टीतय्सं चुनावया इलय् व्यापारीतय्के कयातःगु चन्दाया फल बीगु लागिं उमिसं न्ह्याक्व हे भाः थकाःसां सुनां छुं याइ मखु। सकलें सुम्क च्वनाच्वनी। गुकिं यानाः तुया भाः यथावत जुयाच्वनी, मजदूरया ज्याला यथावत जुयाच्वनी तर चिनीया भाः धाःसा थहां वनाच्वनी। वास्तवय् तु व चिनीया भाः दथुइ दुगु अन्तर स्वयेगु खःसा उकिं किसानतय्त मार व व्यापारीतय्त अप्वः लबः वनाच्वंगु खँ प्रस्टं सी दइ। थःत समाजवादी धाइपिं पार्टीतय् सरकारं थज्याःगु खँय् ध्यान तयेमाःगु अतिकं आवश्यक दु ।
लबःया मात्रा व्यापारीयात वन धाःसा छम्हूचिया ल्हातय् वनी, किसानयात वन धाःसा अप्वःसिया ल्हातय् वनी। उकिं सरकारं निम्ह प्यम्ह व्यापारीयात स्वयां बहुसंख्यक किसानतय्त अत्यधिक लबः वनी कथंया नीति ज्वनेमाःगु आवश्यकता दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
