थुकथं पलिस्था जुल शंखधर सिरपाः

छक्वः पद्मरत्न तुलाधर, कैलाशभक्त प्रधानाङ्ग, डा. पुष्पराज राजकर्णिकार, गणेशराम लाछिपिं छक्वलं हे सिक्किम थ्यंगु जुयाच्वन। सिक्किम नेवार संगठनया ब्वनाय् उखे वंगु इलय् भाजु कैलाशभक्त प्रधानाङ्गं अन हे नेपाल संवत थेंज्याःगु नेपाःया मौलिक संवतया प्रचार प्रसार यायेत ग्वाहालि याना वयाच्वंगु छुं नं संस्थायात छगू सिरपाः बीगु कथं सिरपाः नीस्वनेगु मतिं थम्हं दां फ्यायेगु बिचाः प्वंकादिल। अन हे छक्वलं वय्कःपिं प्यम्ह न्याम्हेसिया दथुइ सल्लाह जुयाः न्हूदँ सिरपाः बीत पद्मरत्न तुलाधरया अध्यक्षताय् न्हूदँ हना सिरपाः समिति नीस्वन। थथे सिक्किमय् च्वनाः नीस्वंगु उगु सिरपाः समितिं येँय् लिहां वयाःलि उगु सिरपाः सुयात गबलय् बीगु धकाः सल्लाह जूबलय् नेपाल संवत्या प्रचार प्रचारय् योगदान याना वयाच्वंगु खस नेपाली भाषाया राष्ट्रिय न्हिपौ तत्कालीन 'आजको समाचारपत्र' यात सिरपाः बीगु क्वःजित ।

सिरपाःया लागिं आः तक फुक्कं दांया व्यवस्था भाजु कैलाशभक्त प्रधानाङ्गं व्यक्तिगत रुपं याना वयाच्वंगु दु। नेपाल संवत् १११८ य् अथे धइगु थौं स्वयां झिंस्वदँ न्ह्यः थ्व सिरपाः नीस्वंगु खः। थ्व सिरपाः नीस्वंसांनिसें 'आजको समाचारपत्र' धुंकाः नेपालभाषाया न्हिपौ सन्ध्या टाइम्स, स्वनिगः वाःपौ, हेटौंडा वाःपौ, अप्सरा वाःपौ, कान्तिपुर राष्ट्रिय न्हिपौ, मेट्रो एफ. एम., इमेज च्यानल टेलिभिजन, लाय्कू बाःछि पौ, अर्थ पिथना प्रकाशनं पिथना वयाच्वंगु रंगीन नगुमा, गोरखापत्र न्हिपौ, नेपाल लिपि गुथिं पिथंगु म्हिचापौयात लःल्हाये धुंकूगु दु। वयां लिपा आः थ्व सिरपाः सुयात लःल्हायेगु धइगु न्ह्यसः ब्वलंबलय् थीथी पत्रपत्रिका, विद्युतीय सञ्चार माध्यम व ब्रोडकाष्टिङ्ग माध्यमया अडियो भिडियो सञ्चार माध्यम लिपा नेपाल संवत्या प्रचार प्रसार यायेत मोटरसाइकल र्‍याली मार्फत् योगदान याना वःगु ज्यायात कदर यानाः थुगुसी नेपाल संवत् ११३० या शंखधर सिरपाः सिन्हःस्वां खलःयात लःल्हाःगु दुसा आधुनिक सञ्चार माध्यम कथं वेब साइट मार्फत नेपाल संवत्या प्रचार प्रसार यायेगु ज्याय् योगदान दुपिं समूह कथं नेपालमण्डल डट कमयात थुगुसी नेपाल संवत् ११३१ या शंखधर सिरपाः लःल्हाःगु दु ।

न्हापा 'आजको समाचारपत्र'यात लःल्हाःगु इलय् थ्व सिरपाः न्याद्वः तकाया खःसा लिपा थ्व छक्वलं अप्वयेकाः झिद्वः तका याःगु खः। आः वयाः थगुनेया सिरपाः ११,०३०/ तका थ्यंगु दुसा थुगुसी थुगुसी सिरपाः ११,०३१/ तका थ्यंकूगु दु। सिरपाः नीस्वंगु इलय् पद्मरत्न तुलाधर, कैलाशभक्त प्रधानाङ्ग, गणेशराम लाछि, तेजेश्वरबाबु ग्वंगः व डा. पुष्पराज राजकर्णिकारपिं जक च्वनाः नीस्वंगु न्हूदँ सिरपाः लिपा शंखधर सिरपाः कथं नामाकरण जूगुया नाप नापं थुकी शरद कसाः, पृथ्वीमान शाक्य, सुरेन्द्रविक्रम प्रजापति व रन्जनादेवी प्रधानाङ्गपिं नं दुजः कथं दुथ्याकूगु खः। छगू ल्याखं नेपाल संवत्या प्रणेता कथं लिपा थुगु सिरपाःया नां शंखधर सिरपाः धकाः तःगु खःसा न्हूदँ सिरपाः समितिया नां नं शंखधर सिरपाः समिति धकाः न्हूगु नां छूगु दु। थुगु सिरपाः नीस्वनेगु स्वयां नं थुकियात निरन्तरता बीगु ज्या तसकं थाकु। तर आः तकं झिंनिक्वः तक थ्व सिरपाः निरन्तर रुपं बी धुंकूगु दु। थुगुसी हे जक गणेश मावि मध्यपुर नगदेशय् थगुने व थुगुसीया सिरपाः छक्वलं बिउगु खः। उकियात नं कैलाशभक्त प्रधानाङ्गजुं हे दांया व्यवस्था यानादिल।
येँपाखें हनेबहःम्ह पद्मरत्न तुलाधर, यलपाखें डा. पुष्पराज राजकर्णिकार व ख्वपपाखें तेजेश्वरबाबु ग्वंगःयात दुथ्याकाः थिमिया गणेशराम लाछिया पहलय् नगदेशया कैलाशभक्त प्रधानाङ्गयात दाता कथं नाला थ्व सिरपाः नीस्वनादीगु खः। आः उगु सिरपाः आकिवं सुयात बीगु धइगु तयारी नापं नेपाल संवतया प्रचार सुनां गुकथं गथे यानाः यानाच्वंगु दु धइगु मालेकुले ज्या नं न्ह्यानाच्वंगु दु। स्वये आकिवं थ्व सिरपाः सुनां काइ?

More Stories Like this