तिकि तिकि सीडी विमोचन ज्याझ्वः - दक्वसिबें ल्वःमंके मफइगु दिं

निर्मल बज्राचार्य

ने.सं. ११३० कौलागा आमै सन्चरवाः क्षेत्रपाति पार्टी पालेसया सभाकक्ष दुनेया ९:३० निसें १०:३० तकया ई जिगु जीवनया दक्वसिबें ल्वःमंके मफइगु दिं व ई । वि. सं. २०४३ पाखे नेपालभाषा ख्यलय् जिगु च्वसा न्हापांगु खुसिइ न्ह्याःगु खःसा २०५३ भदौ ३ गते रेडियो नेपालया स्टुडियोपाखें एफएम काठमाडौं १०० मेगाहर्जय् दकलय् न्हापांगु खुसिइ जिगु सः थ्वःगु खः । थुपिं निगुलिं ई व दिं नं लुमंके बहःगु हे खः तर उकी आत्म सन्तुष्टि माले थाकु ।

तःगु मछि सभा समारोहय् ज्याझ्वः न्ह्याकामि (एमसी) जुया तर वि. सं. २०६७ कार्तिक २० ने.सं. ११३० कौलागा आमै खुन्हु जि अतिकं लुधं, जि जक मखु उगु ज्याझ्वलय् झायादीपिं सकलें उतिकं लुधं । अबलय् जिं थःत भाग्यमानीम्ह तायेका । थुकिया निम्तिं नांजाःम्ह लय् चिनामि गोविन्द ह्यूमतयात जिं न्ह्याक्व सुभाय् ब्यूसां म्हो जक जुइ । छुं नं दिनय् छुं छगू ज्या मजुल वा स्यन धकाः हारे चाय् मज्यू धइगु ज्ञान जितः दत । छुं नं छगू ज्या मजुइ वा स्यनीगु धइगु मेगु छगू ज्या जुइगु वा भिनीगु खः धकाः जिं थुइके फत । कार्तिक १७ गते छगू ज्या जुइ माःगु तर मजुल, जि सरासर लिहां वया च्वनागु इलय् वसन्तपुलिइ गोविन्द नाप लात । अबले हे जितः प्रतिसराया सीडी विमोचन ज्याझ्वः न्ह्याकेत इनाप यात, जिं उकियात सहर्ष स्वीकार याना । कार्तिक १७ गते गुगु ज्या मजुल उकिया कारक ब्यक्ति वा परिस्थितियात जिं दुनुगः निसें सुभाय् बिया गुकिया हुनिं हे अपाय् जिगू ज्याझ्वः न्ह्याकेगु ह्वःताः जितः चूलात………।

मिखां क्वज्वःगु निफुति लः म्येया धिसिलाःगु म्येग्वः व लय् अबले तिनि सजीव जुल गबले सशक्तगु सःया धनी संगीता शाक्यं उकियात प्रत्यक्ष हे हाला दिल । म्येया खँग्वःत फसय् बहाः वं लिसे प्रतिसराया मिखाया नापनापं तिकि तिकि नांया सीडी विमोचनय् झाया दीपिनि मिखां व म्ये हालामि संगीताया मिखां नं ख्वबि बहाः वल । स्वन्ति नखःया लक्ष्मीपूजाया लिमलाःगु इलय् नं छुं भचा न्ह्यइपुके धकाः मनं तुनाः विमोचनय् झाया दीपिन्त छक्वलं भावविह्वल याकल……। २०६७ बैशाख १ गते मांया ख्वाः स्वयेगु दिं खुन्हु मेट्रो एफएमया छगू ज्याझ्वलय् ज्याझ्वः न्ह्याकामि रिता महर्जननाप प्रतिसराया खँल्हाबल्हा जूबले रितां प्रतिसरायात मांनाप स्वापू दूगु म्ये म्हो जूगु खँ न्ह्यथंगुया लिच्वः खः मिखां क्वज्वःगु निफुति लः अले थ्वहे म्ये दुथ्याःगु तिकि तिकि नांया सीडी विमोचन ।

जितः बियातःगु ज्याझ्वः धलः कथं संगीताया सलं हिहिलंक ख्वःम्ह प्रतिसरायात भचा हे झासु लंके मलावं थःगु नुगः खँ प्वंकेत जिं दबुलिइ सःते माल, स हे सःता । थःगु नुगःयात क्वात्तुक चिनाः थः पूर्वज तापाः अजि हरिमाया, अजा ऋद्धिबहादुर, अजि शकुन्तला, अबु काकाभाई व मां वसुन्धरायात लुमंकाः छझ्वः निझ्वः छु न्वनाना दिल, प्रतिसरां थःत ची हे मफत हानं ख्वल । अबले जितः मतिइ लुलकि प्रतिसरायात भचा लिपा जक ब्वने माःगु धकाः तर हानं थःत दृढ यानाः दबुलिइ च्वना दीपिं मांपिन्त हनाबना तये कथं थःगु साहित्यिक यात्राय् मदिक्क न्ह्याः वनेत तिवः ब्यूम्ह थः जहान दीपकया मां चय्छदँ दुम्ह रत्नकुमारी मानन्धर थः ल्यासेबले मिसा जुयाः धिसिलाक्क न्ह्याः वनेमाः धकाः हःपाः ब्यूम्ह पासामां साहित्यकार कृष्णदेवी वज्राचार्य, थः मचा बले सुसाःकुसाः याःपिं चमांपि बद्रीदेवी मानन्धर व जमलदेवी मानन्धर व थः अतिकं स्याःन्याःम्ह पासा स्व. सहाना प्रधानया मां सुभद्रा श्रेष्ठयात मिखाय् ख्वबि तयाः वय्कःपिनिगु गुणयात लुमंकुसें छ्यं क्वछुका दिल । थुगु इलय् दबुलिइ च्वंपिं सकलें मांपिं व तिकि तिकि या निम्तिं सः ब्यूपिं मय्जुपिं संगीता शाक्य, रत्नशोभा महर्जन, रिता महर्जन, ललिता मानन्धर, लसता जोशी, देविका वज्राचार्य, निशा देसार व शिवान्श श्रेष्ठया मिखाय् ख्वबि लःलः धाःगु खःसा विमोचनय् झाःपिं सकलें न्हापा सिबें भचा अप्वः भावविह्वल जुल । एल्बमय् सः ब्यूपिं मध्ये करुणा मानन्धर, प्रतिमा राजभण्डारी, मारुती भण्डारी व एरेन्जर जिवित जलमिपिं नखःझाः मलानाः झाया मदी । भावविह्वलया लकसयात भतिचा चीकेथें प्रतिसरां सीडी पिथनेत ग्वाहालि यानादीपिं सकलसित सुभाय् व सीडी लःल्हानादिल ।

म्ये न्यंकेगु झ्वलय् देविकां थःगु यइपूगु सलं म्ये च्वमि निदँतक दुबही च्वंगु इलय् थः न्हूम्ह छय् प्रत्यक्ष स्वये मखंगु भावं च्वया तःगु म्येयात न्ह्यब्वया दिल । पुलांगु कृतियात लुमंके कथं गोविन्द ह्यूमतं प्रतिसराया न्हापांगु एल्बमया छं केवल म्ये यइपुक्क न्यंका दिल । म्ये धुंकाः गोविन्द तिकि तिकि एल्बम तयार यायेगु झ्वलय् थःम्हं यानागु अनुभव कनेगु झ्वलय् थःगु स्वीदँ पुलांगु सांगितिक यात्राय् न्हापांगु खुसिइ मिखां क्वज्वःगु निफुति लः रेकर्ड जूबले स्वंम्हं सर्जकत नापं ख्वयागु खँ कना दिल ।

ज्याझ्वलय् सुभाय् देछायेगु भाला क्वबुया दीम्ह म्ये च्वमिया थःगु ज्याकू नेपाल वायुसेवा निगमया सहकर्मी व दाजु कवि भगतदास श्रेष्ठं म्ये च्वमिया वहुआयामिक प्रतिभायात कुला दिसें साहित्यिक सिर्जनायात कयाः सहलह जुइगु खँ नं कनादिल ।

सभानायःया थासं थःगु नुगः खँ कनेगु झ्वलय् नेपालभाषा मंकाः खलःया न्हूदँ समारोह समिति ११३१ या नायः विपेन्द्र महर्जनं प्रतिसरां मय्जुपिन्त न्ह्यचीकेगु परम्परा न्ह्याकूगुलिं मेपिन्सं नं थुकियात अनुसरण यायेत इनाप यानादिल ।

दीपक मानन्धरया निगूगु देछा कथं पिदंगु तिकि तिकि या विमोचन वय्कःया हे मां रत्नकुमारी मानन्धरं त्वाःदेवाय् मत च्याके सात्कें हे सीडीया तःपाःगु कभर डिजाइन त्वपुना तःगु कापः क्वफानाः उलेज्या यानादीगु खः । थुगु न्हू पहःया अजूचायापूगु उलेज्या स्वयेगु ह्वःताः नं चूलात ।

जनकवि दुर्गालाल श्रेष्ठ, शिक्षाविद् लक्ष्मण राजवंशी, नेपाल एअरलाइन्सया कार्यकारी नायः सुगतरत्न कंसाकार, कलाकार किरण मानन्धर, संगीतकार न्ह्यू वज्राचार्य, वरिष्ठ बालरोग विशेषज्ञ डा. धर्मशरण मानन्धरया नापनापं थीथी ख्यःया व्यक्तित्वपिनिगु उपस्थितिं ज्याझ्वःयात तिवः जूगु महसुश जुल ।

दकले लिपा छचाः सीडी उलेज्या यायेगु त्वहः चिनाः थःत जन्म ब्यूम्ह मां व थःगु जीवनया थी थी थलाःक्वलातय् हःपाः व तिबः ब्यूपिं मांपिन्त सार्वजनिक कथं हनेगु परम्पराया न्ह्यलुवापिं दिपक मानन्धर व प्रतिसरा साय्मि नापं वय्कःया सकल छेँजःपिं व ग्वाहालिमिपिन्त दुनुगः निसें अभिवादन !

More Stories Like this