नगरकोट वःपिं पर्यटक थाय् मदयाः लिहाँवन
ख्वप (झीगु स्वनिगः)
पर्यटन दँ न्ह्यायेधुंकाः ख्वपया नगरकोटय् वनीपिं पर्यटकतय्गु ल्याः अप्वयेवं च्वनेगु थाय्या अभाव जूगु दु । जनवरी १ निसें नगरकोट वनीपिं आन्तरिक पर्यटकतय्गु ल्याः अप्वयेवं होटल मदयाः आपालं पर्यटकत लिहाँवंगु व गुलिखय् क्याम्पय् हे चा छ्याःगु नगरकोट नाल्दुम पर्यटन विकास समितिया छ्याञ्जे दिपक लामिछानें धयादिल । आः नगरकोटय् बाह्य स्वयाः आन्तरिक पर्यटकतय्गु चाप अप्वःगु धासें वय्कलं न्हियान्हिथं द्वःछि पर्यटक नगरकोट वयेगु यानाच्वंगु धयादिल ।
शुक्रबाः व शनिबाः नगरकोटय् आन्तरिक पर्यटकया कारण च्वनेगु थाय्या अभाव जुइगु यानाच्वंगु दु । नगरकोटय् दुगु स्वीखुगू होटलय् करिब प्यसः पर्यटकत जक चा छ्यायेफइकथंया क्षमता दुगु नं लामिछानें धयादिल ।
