हेरिटेज वाक नांया मार्गचित्र पिथनीगु

येँ (झीगु स्वनिगः)

येँ महानगरपालिकां पर्यटन दँय् नगरदुने चाःह्यू वइपिं पर्यटकतय्गु सहजताया नितिं महत्वपूर्ण सांस्कृतिक सम्पदा क्षेत्रदुने 'हेरिटेज वाक' नांया मार्गचित्र प्रकाशन याइगु जूगु दु । पर्यटकतय्त प्राचीन स्मारक लिसे सांस्कृतिक सम्पदाया बारे पर्याप्त ज्ञान बिइगु नितिं सम्बन्धित मठमन्दिर, बहाबहि अन्तर्गतया थीथी द्यः, सांस्कृतिक नखः, धर्मयाबारे ऐतिहासिक वर्णनलिसे हलुमानध्वाखा क्षेत्रया पदमार्गया नक्सा -मार्गचित्र) प्रकाशन यायेत्यंगु खः ।

प्रकाशन यायेत्यंगु मार्गचित्र अन्तर्गत कमलाक्षीपाखें इन्द्रचोक, हलुमानध्वाखा, भीमसेनस्थान न्हापांगु मार्ग खः । निगूगु मार्गय् थँहिति, बाङ्गेमुढा, भेडासिं, इटुम्बहाः, हलुमानध्वाखा, जैसीदेगः, ह्युमतः जुयाः टेकुतक खः । उगु मार्गचित्र अन्तर्गतया लिपांगु मार्गयारुपं क्षेत्रपाति, प्याफः, हलुमानध्वाखा, झोछेँ, ओमबहाः, यंगाः, लगं, ब्रम्हत्वाः जुयाः टेकुया मचली व पचली खः । महानगरपालिका अन्तर्गत प्राचीन स्मारक लिसे सम्पदा विभागया प्रमुख इन्द्रमान सुवालं थुगु क्षेत्रय् प्राचीन स्मारक, मठ मन्दिर, बहाःबहि आपालं दुगुलिं पर्यटकतय्त थुगु मार्गय् पदयात्रा यायेबलय् उगु मार्गचित्र व ऐतिहासिक वर्णनलिसेया ब्रसेरं तःधंगु निर्देशन बिइगु जूगुलिं प्रकाशन यायेत्यनागु जानकारी ब्यूगु दु । वय्कलं छवाःयादुने प्रकाशन क्वचायेकेगु धयादिसें उकिया लागत करिब नीगू लाख तुइगु धुकुमाः याःगु दु ।