तुया न्यूनतम भाः कायम : किसानतय्गु आन्दोलन लित काल

येँ (झीगु स्वनिगः)

तुया न्यूनतम भाः कायम यायेमाःगु माग यानाः आन्दोलनय् कुहाँवःपिं तु किसानं भाः क्वःछीधुंकाः आन्दोलन लित काःगु दु । म्हिगः येँय् प्रधानमन्त्री माधवकुमार नेपाललिसेया वार्ताय् तुया न्यूनतम भाः प्रतिक्विन्टल प्यसः व छतका कायम यायेगु सहमति जुइवं किसानतय्सं आन्दोलन लित काःगु खः । भाः क्वःछीधुंकाः आन्दोलन लित कयाःगु तु उत्पादक महासंघया नायः कपिलमुनी मैनालीं जानकारी बियादीगु खः । तु किसानं प्यसः व छतका माग यानाः वयाच्वंगु खःसा उद्योगं स्वसः व स्वीतका स्वयाः अप्वः बिइमफैगु जानकारी बियाः वयाच्वंगु खः ।

अथेहे थःम्हं उत्पादन यानागु तुया उचित भाः कायेगु किसानतय्गु आन्दोलन दबय् यायेत सर्लाही प्रशासनं हरिऔन क्षेत्रय् म्हिगः न्हिच्छियंकं कफ्र्यु तःगु खः । पूर्वपश्चिम राजमार्गकथं पूर्वय् लखन्देही पुलनिसें पश्चिमय् बागमती खुसितक्क न्यासः मिटर जःखः सुथसिया च्याताः इलंनिसें बहनीसिया न्याताः ईतक्क कफ्र्यु तःगु खः । कफ्र्यु चायेधुंकाः सर्बसाधारणया चहःपहः अप्वःगु स्थानीय सम्वाददातां जानकारी ब्यूगु दु । तु किसानतय्गु आन्दोलन शान्तिपूर्ण मजूगु लिच्वः पिकाःसें स्थानीय प्रशासनं कफ्र्यु तःगु खः ।