उपराष्ट्रपतिया प्रेस सल्लाहकारयात न्यासः तका जरिवाना, पत्रकार त्वःतल

येँ (झीगु स्वनिगः)

थःगु पत्रिकाय् भूमिगत पुचःया सैन्य भर्नाया विज्ञापन छापय् याःम्ह उपराष्ट्रपति परमानन्द झाया प्रेस सल्लाहकार राजेश झा 'अहिराज'यात विशेष अदालतं दोषी तायेकूगु दु । गौरीबहादुर कार्की, ओमप्रकाश मिश्र व केदारप्रसाद चालिसेया इजलासं झायात दोषी तायेकाः न्यासः तका जरिवाना क्वःछ्यूगु दु । झा सम्पादक दुगु मधेशवाणी साप्ताहिकया असोज १ गतेया ल्याःसं भूमिगत समूह जनतान्त्रिक तराई मुक्ति मोर्चाया सैन्य भर्ना चाःगु बिज्ञापन छापय् याःगु खः । राष्ट्रिय अखण्डताय् आँच वइगु सामग्री छापय् याःगु धासें झाबिरुद्ध विशेष अदालतं मुद्दा दायर याःगु खः । थ्वहे दथुइ थःहे ग्वाहालिमियात अश्लील इमेल छ्वःगु द्वपनय् ज्वंम्ह पत्रकार बिकास थापा म्हिगः प्यलालिपा पिहाँवःगु दु ।

सर्बोच्च अदालतं वय्कःयात नीन्याद्वः तका धेबा धरौटीइ त्वःतेत उजं ब्यूगु खः । थापायात पुर्पक्षया नितिं थुनाय् छ्वयेगु येँ जिल्ला अदालत व जिल्ला अदालतया निर्णययात सदर यायेगु पुनरावेदन अदालत यलया फैसला अःखः यानाः सर्बोच्चया न्यायाधीशपिं ताहिरअलि अन्सारी व प्रकाश वस्तीया मंकाः इजलाशं पत्रकार थापायात त्वःतेत उजं ब्यूगु खः । सर्बोच्चया फैसलालिपा पत्रकार थापां आः थुनाय् मच्वंसे मुद्दा ल्वायेफइगु जूगु दु ।

मिसा सभासद्त पाखें ध्यानाकर्षण
येँ -झीगु स्वनिगः)
न्हूगु दयेकीगु संविधानय् नागरिकताबारे विभेदरहित प्रावधान तयेत दवाब बिइत मिसा सभासद््तय्सं म्हिगः थीथी राजनीतिक दलया नेतृत्वया ध्यानाकर्षण याकूगु दु ।
संविधानसभाय् प्रतिनिधित्व याइगु दलतदथुइ नागरिकता विवाद हाकनं पिदनाच्वंगु इलय् मिसा सभासद्पिंसं थ्व अभियान न्ह्याकूगु खः । सभासद्पिनिगु पुचलं म्हिगः मू दलया शीर्ष नेतातलिसे नापलानाः उच्चस्तरीय कार्यदलं अंगीकृत नागरिकताया विषयसं याःगु निर्णयया सम्बन्धय् ध्यानाकर्षण याकूगु खः ।
नेकपा -एमाले)या नायः झलनाथ खनाल व नेपाली कांग्रेस संसदीय दलया नेता रामचन्द्र पौडेललिसे सिंहदरबारय् जूगु नापलाये ज्याय् अङ्गीकृत नागरिकता बिइबलय् भौ व जिलाजं दथुइया विभेद याःगु धासें उमिसं नेतातय्गु ध्यानाकर्षण याःगु खः ।