संरक्षण मजुयाः बहुमूल्य जडीबुटी सितिंवन

पर्वत (झीगु स्वनिगः)

पर्वत, कास्की व स्याङ्जाया सङ्गमस्थलय् दुगु पञ्चासे क्षेत्रय् दइगु बहुमूल्य जडीबुटी संरक्षण व उपयोग मजुयाः लाखौंया श्रोत सितिं वनाच्वंगु दु ।
जैविक विविधताया खानी पञ्चासेय् दइगु विश्वया हे दुर्लभ जडीबुटीया वैज्ञानिक अनुसन्धान व सही उपयोग मजुयाः करोडौंया सम्पत्ति अथें त्वःताःतःपिं चौपायाया चरन जूगु दु । आःतक्क सरकारीस्तरपाखें छु नं अध्ययन, अनुसन्धान मजूसां नं वंगु असोज ७ गते विश्व संरक्षण दिवसय् वन विभागं पञ्चासेयात 'संरक्षण क्षेत्र' घोषणा याःगु खः । थःगु क्षेत्रय् बहुउपयोगी जडीबुटी आपालं दुसां नं राज्यया ध्यान मवनाः सितिं वनाच्वंगु धासें पञ्चासे क्षेत्र लिसे उकिया जःखःया बासिन्दां प्रशोधन केन्द्र पलिस्था यायेत सरकारलिसे माग याःगु दु ।

'सरकारीस्तरपाखें खोज व अनुसन्धान मजुयाः थनया बहुमूल्य जडीबुटी अथे त्वःताःतःपिं सा, मेय्या नसा जूवंगु दु' नौले छरछरे सामुदायिक वन उपभोक्ता समितिया दुजः रुपेश गुरुङं जानकारी बियादिल । वय्कःयाकथं विश्वया स्वसः व न्ह्यगू मध्ये सच्छि व न्यय्छगू प्रजातिया जडीबुटी थुगु हे क्षेत्रय् दु । विश्वय् दइगु स्वसः व च्यय्छगू मध्ये निसः व ख्वीखगू प्रजातिया सुनाखरी नं थुगु हे क्षेत्रय् दु । माछापुच्छ्रे विकास सङ्घं झिंन्यादँ न्ह्यः याःगु जैविक अनुसन्धानय् उगु जडीबुटी सम्बन्धी तथ्य सीदुगु खः । समुद्र सतहपाखें न्हय्सः व च्यय्प्यंगू निसें नीन्यासः व झिंन्हय्गू मिटर उचाइया उगु जंगलया क्षेत्रफल करिब न्याद्वः व न्यासः हेक्टर दु । थनं हिमाली क्षेत्रय् दइगु थीथी जातिया वनस्पति व वन्यजन्तु नापं दु । थुगु क्षेत्रय् दकले अप्वः दइगु वनस्पति सुनाखरी खः । थ्व बाहेक चिराइतो, जामुने मान्द्रो, लोठ सल्ला, उकु डाइना, सतुवा, कुरिलो, पाखनबेत, वन लसुन लगायत बहुमूल्य जडीबुटी आपालं दइगु संघं जानकारी ब्यूगु दु । संघया वरिष्ठ ज्याझ्वः अधिकृत रामशरण सेढाइर्ंयाकथं थनं झिंनिगू कथंया वन जङ्गल दु । उकिइ न्यासः व च्यय्गुंगू जातिया स्वां ह्वइगु वनस्पति, सच्छि व न्यय्गू जातिया औषधिजन्य जडीबुटी, सच्छि व झिंस्वंगू कथंया सुनगाभा -सुनाखरी), गुइच्यागू कथंया उन्यू जातिया वनस्पति, न्यय्खुगू जातिया जङ्गली च्याउ, झिंच्यागू जातिया पुष्प व्यवसाय जन्य वनस्पति व च्यागू जातिया रेसादार वनस्पति दु ।

गामय् च्वंपिंसं बिरामी जुइबलय् उगु जडीबुटीया छ्यलाः वयाच्वंसां नं थुकिया व्यावसायिक उपयोग जुइफूगु मदुनि । छ्यं स्याइगु, ज्वर वइगु, प्वाः स्याइगु लिसे रक्तचापया बिरामीया नितिं स्थानीयबासीं थनया जडीबुटी छ्यलाः वयाच्वंगु दु । स्थानीय पर्यटन व्यवसायी आशबहादुर गुरुङ्गं साधनस्रोत मदयाः दँय्दँसं सितिं वनाच्वंग करोडौं तकाया जडीबुटी सदुपयोग जुइमफूगु वय्कलं धयादिल ।

More Stories Like this