आयल निगमया प्रतिवेदन सार्वजनिक

येँ (झीगु स्वनिगः)

नेपाल आयल निगमं सोमवाः थःपिनिगु प्रतिवेदन सार्वजनिक याःगु दु । आयल निगमं भ्रष्टाचार याःगु खँय् प्यख्यरं द्वपं वयेवं उकिया स्पष्टीकरण बिइगु नितिं उगु प्रतिवेदन सार्वजनिक याःगु खः । उगु प्रतिवेदनकथं निगमयात लच्छिया ख्वीन्यागू करोड घाटा जुइगु यानाच्वंगु दु । इण्डियन आयल कर्पोरेसन -आइओसीं) छ्वःगु लिपांगु भाःकथं पेट्रोलय् प्रतिलिटर नितका व ४२ पैसा, डिजलय् न्यातका व ५३ पैसा व एलपी ग्याँसय् प्रतिसिलिन्डर स्वसः व ख्वीस्वतका व १६ पैसा घाटा जुइगु यानाच्वंगु निगमं जानकारी ब्यूगु दु । उगु प्रतिवेदनय् अन्तर्राष्ट्रिय बजारय् पेट्रोलियम पदार्थया भाः थकायेगु ज्या न्ह्यानाच्वंगुलिं भाः थहाँवंगु निगमं स्पष्ट याःगु दु । आइओसीं जनवरी - १ य् छ्वःगु लिपांगु मूल्यसूचीकथं कर लिसे मेमेगु सेवा शुल्क बाहेक पेट्रोल न्यय्स्वतका व ६२ पैसां आयात जुइगु यानाच्वंगु दु ।

पेट्रोलय् निगमयात लच्छिया घाटा स्वंगू करोड ख्वीस्वंगू लाख तका दुगु निगमं जानकारी ब्यूगु दु । अथेहे डिजलय् लच्छिया घाटा स्वीच्यागू करोड न्हय्छगू लाख थ्यंगु दु । डिजेलया आयात मूल्य न्यय्न्यातका ९० पैसा दुसा मचिकनय् निगमयात छगू करोड न्हय्स्वंगू लाख ख्वीद्वः तका लबः दुगु जानकारी ब्यूगु खः । आईओसीलिसे मचिकंया क्रयमूल्य न्यय्खुतका व ८० पैसा दु, हवाई इन्धनय् आन्तरिकपाखे स्वंगू करोड ख्वीखुगू लाख व अन्तर्राष्ट्रिय उडानय् च्यागू करोड न्यय्न्यागू लाख लबः दुगु निगमं जानकारी ब्यूगु दु । हवाई इन्धनया आयात मू पीगुतका व ९४ पैसा दु । अथेहे, एलपी ग्याँसया लिपांगु आयात मू प्रतिसिलिण्डर द्वःछि व निसः व पीतका थ्यंगु दु । ग्याँसया कारोबारय् निगमयात लच्छिया स्वीखुगू करोड व स्वीछगू लाख व ख्वीद्वः तका घाटा जूगु दु । निगमं वंगु मंसिरय् पेट्रोल, डिजेल व मचिकंया भावय् प्रतिलिटर नितका व ग्याँसय् प्रतिसिलिन्डर न्हय्न्यातका भाः थकाःगु खः ।

More Stories Like this