चक्रव्यूह तछ्यायेमाः

- धनञ्जय शर्मा

वंगु मंसिर ५ गते निसें ११ गते तक्क गोरखाया पालुङ्गटारय् च्वंगु एकीकृत नेकपा -माओवादी)या विस्तारित वैठकं तत्कालिन कार्यदिशा व कार्ययोजनाय् एकतावद्ध जुयाः न्ह्याःवनेगु सहमतिया बुँदाय् जनवादी केन्दि्रयताया आधारय् वहस यायां वनेगु सहमति याःगु दु । देशीय प्रतिकृयावादी, वैदेशिक साम्राज्यवादी व विस्तारवादी शक्तित माओवादी पार्टी तज्यानाः कुचाकुचा जूगु स्वयेमास्ति वः । पालुङ्गटार वैठकं पार्टीयात छप्पं यानाः यंकेगु नितिं मार्गप्रदशस्त जक याःगु मखु, पार्टीइ खनेदुगु गलत प्रवृत्तिया विरुद्ध खः कथं मुइकूगु दु । विस्तारित वैठकं पार्टीदुने दुगु गुलिखय् विचारधारात्मक व सैद्धान्तिक विषयलय् व्यापक रुपय् वहस यानाः लिच्वलय् थ्यंकेगु क्वछ्यूगु दु । नेपाली क्रान्तिया वारे छुं ई थुखे पार्टीया मुख्य नेेवाःतय्गु दथ्वी न्ह्याःगु बहस व स्वंगू फरक फरक राजनीतिक प्रस्ताव तय्गुली गम्भीर वहस यानाः सहमतिया छगू निष्कर्षय थ्यंकेगु आवश्यकता दु । थुकिया नितिं पार्टीं माःगु हेे कयाः महाधिवेशनया ग्वसाः ग्वयाः क्वछीगु अनिवार्य जुइ । थौंया राजनीतिक समस्याया निकास वीत व क्रान्तिया कार्यभार पूवंकेत विस्तारित वैठकं तत्काल केन्दि्रय समितिया वैठक च्वनाः तत्कालिन कार्यदिशा व कार्ययोजना क्वछीगु जिम्मा व्यूगु दु ।

जीवित पार्टीइ पार्टी व क्रान्तिया हितय् नितिं वहस व छलफल जुइगु स्वभाविक व अनिवार्य दु । जनवादी केन्दि्रयताया आधारय् संघर्ष वल्लाःगु एकता कायम यायेगु क्रान्तिकारी पार्टीया नियमहे खः । वाद, विवाद व संवादया माध्यमं पार्टीइ, दुगु गलत चिन्तन व प्रवृत्तितय्त निषेध यानाः रुपान्तरण यायेगु आवश्यक दु । विस्तारित वैठकं व्यूगु म्यान्डेटया आधारय् पार्टी दुनेया थुइकेगुली एकरुपता कायम यानाः कार्यदिशा व कार्ययोजनाय् एकमत जुयाः जक पार्टीया ऐतिहासिक कार्यभारयात पूवंकेफु । वैज्ञानिक व वस्तुवादी ग्वसाः लिसें पार्टीयात एकीकृत व केन्दीकृत दयेकाः यंकेफुसा जक थौ खनेदुगु हाथ्यातय्गु विरुद्ध ल्वायेफु । वर्तमान राजनीतिक घटनाक्रम तसकं जटिल मोडय् न्ह्यःने वनाच्वंगु दु ।
देय् राजनीतिक संकटया चक्रव्यूहलय् तःक्यना च्वंगु दु । थुकियात तछ्यायेगु मू दायित्व माओवादीयात हे खः । शान्तिपूर्ण संविधानसभाया माध्यमं संविधान दयेकीगु व सेना समायोजनया सम्भावना तसकं क्षिण जुयाः वःगु दु । प्रतिकृयावादी व यथास्थितिवादी शक्तित छुंनं हालतय् जनमुखी संविधान दयेकेत व समान जक रुपं सेना समायोजन याके वीगु पक्षय् मदु । पार्टीं शान्तिपूर्ण संविधान दयेकेगु पक्षय् संघर्ष यायां वनेगु आवश्यक दु । अथ्य मजुइकेत दीगो शान्ति, जनमुखी संविधान व राष्ट्रिय स्वाधिनताया नितिं जनविद्रोहं सत्ता कायेगु अनिवार्य जुइ । उकिया नितिं पार्टी, जनमुक्ति सेेना, वाइसियल, मोर्चात, जनवर्गीय संगठन, जनसमुदायया लिसें फुक्क देशभक्त, वामपन्थी व प्रगतिशील शक्तितय्त छप्पँ यायेगु अनिवार्य जुइ ।
१० दँया महान जनयुद्ध व १९ न्हिया शान्तिपूर्ण जनआन्दोलनं वःगु उपलब्धीतय्गु रक्षा व विकासया नितिं आमूल परिवर्तनया वाहक किसान पार्टीइ क्वातूगु एकता अनिवार्य सर्त खः । एकताया नामय् फरक मत नं जुइमज्यू धयागु खँ द्वन्द्ववादया नियमविपरित जुइ । क्रान्तिया विजययात केन्द्रय् तयाः यायेगु वहसं पार्टीं व क्रान्तिया सेवा याइ । क्रान्तिया विषय वा पराजयया निणर्ायक मोडय् वयाः सुनां नितात प्राविधिक विषययात कयाः पार्टीया कार्यदिशा व कार्ययोजनाय् पंगः थनेगु ज्या यातधाःसा वं क्रान्तिप्रतिं गम्भीर गल्ती याःगु ठहरे जुइ ।

उकिं पार्टीइ सुयातं उग्रवामपन्थी, सुयातं मध्यपन्थी व सुयातं दक्षिणपन्थीया तक्मा यख्खाकेगु ज्या यात आत्मसन्तोष कायेगु स्वयाः पार्टीया सिद्धान्त, रणनीति व कार्यनीतिया विषयलय् व्यापक ढंगं वहस यानाः थःथवय् खनेदुगु समस्या समाधान यायेगु लँपुइ वनेगु अनिवार्य जुइ । क्रान्तिया निणर्यक मोडय् यंकेगु नितिं ई तसकंहे म्हो जूगुलिं पार्टीया मूख्य नेतापिसं ठोस योजना दयेकाः कार्यान्वयन यंकेगु आवश्यक दु । महान जनयुद्ध ल्वानाः वःगु पार्टीं योजना निर्माण जनवाद प्रमुख व योजना कार्यान्वयनय् केन्दि्रयता प्रमुख जुइ धयागु खँय् कडारुपं आत्मसात यायेफुसा योेजना सफल जुइफै मखु । गन तक्क नेतृत्व व विचाःया खँ दु, जनयुद्धया कार्यदिशा क्वछ्यूगु निसें १० दँया जनयुद्ध जुयाः प्यदँत्याया शान्तिप्रकृयाया कुशल नेतृत्व याना वम्ह अध्यक्ष क. प्रचण्डया नेतृत्वय् पार्टीया पदाधिकारी सहित फुक्क कमरेडपिं एकीकृत व केन्दि्रकृत जुयाः जक नेपाली क्रान्तिया ल्यं कार्यभारयात न्ह्यःने यंकेफै । गनतक्क विचारया खँ दु, माओवादी पार्टीया क्रान्तिकारी विचाः धयागु सामुहिक नेतृत्वया केन्द्रीयताया अभिव्यक्ति खः । माओवादी पार्टीइ आवद्ध नेता, कार्यकर्ता, जनमुक्ति सेना, परिवर्तनया वाहक जनसमुदाय व शुभचिन्तकतय्गु सामुहिक शक्तिं प्राप्त विचाः हे माओवादी पार्टीया विचाः खः ।

हनेवहःपिं महान सहिदया, गुम्हय्स्यां क्रान्तिया विषयया नितिं प्राणया आहुति वियादिल, नेपाली क्रान्तिं विकास याःगु विचारया विकास वर्गसंघर्षया हिं जन्मय् जूगु विचाः खः । थ्व नेपाली क्रान्तिइ मालेमावादया मौलिक व सिर्जनशील प्रयोगं विकास जुया वःगु दु । नेपाली क्रान्तिइ प्रतक्ष अप्रतक्ष सहभागी जुया वःपिं फुक्कसिगु मेहेनतं विकास जूगु विचाः हे माओवादी पार्टीया विचाः । सशस्त्र जनयुद्ध व शान्तिपूर्ण जनआन्दोलनं क्रान्तियात न्ह्यःनेे यंकेगु झ्वलय् विकास जूगु विचाः यात नेतृत्वं संश्लेषण यायां वःगु दु । न्ह्यागु हे पार्टीया नेतृत्व धयागु सामूहिक नेतृत्वया केन्द्रीकृत अभिव्यक्ति जुइ । झीगु पार्टीइ नं सामूहिक नेेतृत्वया केन्द्रीकृत नेता अध्यक्ष प्रचण्ड खः । वयकःया नेतृत्वय् पार्टीया मुख्य मुख्य नेतातय्गु वैठकच्वनाः विचार संश्लेषण व पार्टीया नीति व ज्याझ्वःत क्वछी । उकिं तुलनात्मक रुपं म्हो वा अप्वः जूसा नं नेतृत्व क्षमताय् छुं अन्तर जूसा नं सामुहिक नेतृत्वं, सामूहिक मेहनतं विचाःया विकास जुयाः वःगु दु । सामूहिक मेहेनतं विकास जूगु विचाःयात सुनांनं जिगु व्यक्तिगत विचाः खः धायेगु असान्र्दभिक जुइ ।
भावी पार्टीया केन्द्रीय समितिया वैठकय् पालुङ्गतार वैठकं व्यूगु म्यान्डेटया आधारय् कार्यदिशा व योजना क्वछीमाः । देेेशयात निकास वीत, महान सहिदपिनिगु म्हगस पूवंकेत पार्टीया लक्ष पूवंकेत, कार्यकर्ताया उचित व्यवस्थापन यायेत व जनसमुदायया आधारभूत आवश्यकता पूवंकेत नं क्वातूगु एकता अनिवार्य जुइ । देशयात सहि निकास वीगु नितिं परिवर्तनया वाहक माओवादी नेतृत्वया सरकार अनिवार्य जुइ । दिगो शान्ति, जनमुखी संविधान व राष्ट्रिय स्वाधिनताया लँपुं सम्भव मजूसा जनविद्रोहया लँ अनिवार्य सर्त खः ।

More Stories Like this