शान्तिपूर्ण विरोधया ज्याझ्वलय् गोली

तुया भाः थकायेमाल धकाः शान्तिपूर्ण विरोध यानावयाच्वंपिं किसानतय्गु विरुद्ध सरकारं गोलीं कयेेकाः सामान्य व अहिंसक विरोध सभाप्रति सरकार निर्मम व हिंसक रुपं न्ह्यःने वःगु दु । कामचलाउ सरकारं राजिनामा वियाः नं खुला अप्वः टेके जुयाच्वंम्ह माधवकुमार नेपालय् सरकारया थुज्वःगुकथं निम्नस्तरीय व हिंसक लिसलं आन्दोलनकारीतय्त थप उत्तेजित यानाव्यूगु दु । संघर्ष समितिया ग्वसाःकथं वंगु आइतवाः लोकमार्ग अन्तर्गतया हरिवन सतक खण्डय् यातायात पनेगु झ्वलय् प्रहरी नापं जूगु ल्वापुइ विना कारण गृहमन्त्री भिम रावलया आदेशय् गोली कयेकेेगु ज्या जूगु दु । अश्रुग्यास व कथिं छ्लाः दाःगुलिइ वन्दुक मन्त्रीं गोलीं हे कयेकेगु आदेश व्यूगु खः । छम्हय्सित छेनय् व मेम्हय्सित तुतिइ गोलीं लानाः अस्पतालय् वासः याकेमालाच्वंगु दु ।

तुया भाः कुहांवल धकाः भाः क्वकाःगुया लिपा थःपिन्त थहेमथल धकाः प्रति क्वीन्तलया भाः ४०१/- या माग यानावःगु खः । तर शान्तिपूर्ण सतक अवरोध ज्याझ्वलय् हस्तक्षेप यानाः गोलीं कयेकेगु म्वाःगु खः । तर जुलुस व सतक अवरोध धालकि कयाः स्याकावःपिं काम चलाउ सरकारं शान्तिपूर्ण ज्याझ्वलय् गोलीं हे कयके माःगु छाय् खः सीकेफूगु मदुनि । सतक अवरुद्ध यायेगु ज्याझ्वः नं उघि्रमयहे वःगु मखु । छुं ई न्ह्यःहे उगु ज्याझ्वः यायेगु धकाः क्वछिना तःगु खः । उगु ज्याझ्वः नं न्हिच्छि मखु, सुथसिया ११ वजेनिसें न्हिनसिया २ वजे तक्क अर्थात प्यघौसतक अवरुद्ध यायेत स्वःगु खः । तु हइयेगुली छ्यलीगु टाय गाडा, ट्रक व ट्याक्टर लँय् दिकाः आवागमन बन्द यानाव्यूगु खः । सामान्य विरोध यायेगु व उकिया नितिं सतक अवरोध यायेगु धयागु सामान्य खँ खः । लोकतान्त्रिक मूल्य मान्यता कथं नं पूर्ण विरोध जुलुस यायेहे दु । तर काम चलाउ सरकारया छाय् कपाः स्याःगु खः, सुनां थुइकेफूगु स्थिति मदु । वंगु आइतवाःया ल्वापुइ डर्जनौ आन्दोलनकारीत जक मखु खुद डेढडर्जन प्रहरीत नं घाःपाः जुल । दर्जनौं आन्दोलनकारीत घाःपाः जूगु दु । प्रहरीतमध्ये १५ म्ह बांम्लाक्क घाःपा जुलसा आन्दोलनकारीत नं दर्जन मनूत घाःपा जूगु दु । अश्रु ग्यासं नियन्त्रणय् वयेधुंकूगु हुलयात हानं छु कारणं वन्दुके मन्त्री रावलं गोलीं कयेकेगु आदेश व्यूगु खः, सीमदुनि ।

सामान्य थःपिनिगु जायज मागया नितिं शान्तिपूर्ण विरोध ज्याझ्वः प्रति सरकारया थुज्वःगुकथंया कायर व हिंसात्मक पलाः छिनाः आन्दोलनकारीतय्त दमन यायेगु विचाः तःगु खःसा, उगु विचाः त्वःतूसा बांलाइ । आन्दोलनकारीतय्गु जायज मागप्रति थुगुकथं म्वाःमदुगु हिंस्ााया रुप बीत स्वल धाःसा सरकारं तःधंगु मू पुलेमाली मखु धकाः धायेफैमखु ।

More Stories Like this