'माओवादीया नेतृत्व स्वीकार’
येँ (झीगु स्वनिगः)
उपप्रधानमन्त्री नापं भौतिक योजना मन्त्री विजयकुमार गच्छेदारं शान्ति व संविधान निर्माण जुइगु सुनिश्चिता जुल धाःसा एकीकृत माओवादीया नेतृत्वय् सरकार स्वीकार यायेफै धकाः धयादिल । म्हिगः सोमवाः महेन्द्रनगरय् पत्रकार भेटघाट ज्याझ्वलय् न्वंवासें वय्कलं अथे धयादीगु खः । वय्कलं माओवादी सेना व ल्वाभः मदुगु पार्टीया रुपय् न्ह्याः वनीगु बांलाःगु आधार दत धाःसा माओवादीया नेतृत्वय् सरकार स्वीकार यायेगु जुइ धकाः नं धयादिल ।
उपप्रधानमन्त्री गच्छेदारं थःपिनिगु पार्टीं एमाले कांग्रेसया गठबन्धन चाहेयाःगु दु धकाः नं धयादिल । संसदया अधिवेशन पुस २५ गते निसें जुइत्यंगु खँ न्ह्यथसें १५ दिंया दुने न्हूगु सरकार दयेकेमाः धकाः नं वय्कलं बहः बियादिल ।
