अनमिन लितछ्वयेगुलिइ भारतया ल्हाः
येँ (झीगु स्वनिगः)
एकीकृत माओवादीया विदेश विभागया प्रमुख कृष्णबहादुर महरां अनमिनयात याकनं हे बिदा बिइकेगु ज्याया ल्यूने भारतया भूमिका दु धकाः धयादीगु दु । क्रान्तिकारी पत्रकार संघ दाङया ग्वसालय् घोराही लागाय् म्हिगः सोमवाः पत्रकार भेटघाट ज्याझ्वलय् न्वंवायेगु झ्वलय् माओवादीया नेता कृष्णबहादुर महरां अथे धयादीगु खः । नेपालय् थः सक्रिय जुइगु नितिं भारतं अनमिनयात याकनं बिदा बिइकेगु षडयन्त्र याःगु खः धकाः नं माओवादीया नेता महरां धयादिल ।
विस्तृत शान्ति सम्झौताया प्रत्यक्षदर्शी जूगुलिं सेना समायोजन न्ह्यः हे अनमिनयात बिदा बिइगु ज्या जुइवं संवैधानिक जटिलता वयेफु धकाः नं धयादिसें वय्कलं अनमिनया खँ क्वःछिइ न्ह्यः हे सरकारया खँ क्वःछिइ फैगु संभावना म्हो जूगुलिं अबले झन हे समस्या वयेफु धकाः नं धयादिल । नेता महरां नेपाली कांग्रेस व एमाले जानाः बहुमत हयाः सरकार चलेयात धाःसा थःपिं प्रतिपक्षय् च्वनेत तयार धकाः नं धयादिल । जेठ १४ गते तकया दुने न्हूगु संविधान दयेके फैगु संभावना झन झन हे म्हो जुयावनाच्वंगु नापं जनआन्दोलया उपलब्धी गुमेजुइगु अवस्था वल धाःसा जनतां बिद्रोह याइगु इलय् माओवादी उकिया नेतृत्व यायेत तयार धकाः तकं वय्कलं धयादिल ।
