'जिम्मेवारी कायेमाः मखुसा पद त्वःतेमाः’
येँ (झीगु स्वनिगः)
उपराष्ट्रपति परमानन्द झा नं राजनीतिक गतिरोध अन्त्य यायेगु नितिं आःया अवस्थाय् कि राष्ट्रपतिं जिम्मेवारी कायेमाल मखुसा पद त्वःतेमाल धकाः धयादीगु दु । संविधानसभाय् दुथ्याःगु राजनीतिक दलतपाखें गतिरोध अन्त्य याये मफुसा राष्ट्रपति डा. रामवरण यादवं गतिरोधया अन्त्य यायेगु जिम्मेवारी कायेत तयार जुइमाः धकाः नं उपराष्ट्रपति झा नं धयादिल । वय्कलं राष्ट्रपति संरक्षक जूगुलिं मुलुकयात लथालिङ्ग जुइक त्वःताः बिस्युं वनेमजिउ धकाः स्पष्ट यानादीगु दु ।
शान्ति व संविधानया सुनिश्चिताया नितिं मूमू राजनीतिक दलतय्गु निणर्यक वार्ता तत्काल न्ह्याकेगु नितिं दबाव बिइत पत्रकारतय्सं न्ह्याकूगु अभियान कथं ज्ञापन पत्र लःल्हायेगु झ्वलय् म्हिगः सोमवाः संचारकर्मीतय्त उप—राष्ट्रपति परमानन्द झा नं उगु कथं बिचाः प्वंकादीगु खः । दल व सरकारं जिम्मेवारी पूरा याये सफुगु अवस्थाय् राष्ट्रपतिं उकिया जिम्मेवारी कायेत तयार जुइमाः धकाः नं धयादिल । मुलुकय् शान्तिसिबें संविधान निर्माणया ज्या महत्वपूर्ण धकाः दावी यानादिसें इलय् हे न्हूगु संविधान निर्माण जुल धाःसा ८० प्रतिशत समस्या समाधान जुइ धकाः नं दावी यानादिसें वय्कलं धयादिल 'संविधान मू खँ खः । उकिं संविधान निर्माणया ज्यायात प्राथमिकता बियाः न्ह्याः वनेमाः। शान्ति ला संविधान निर्माणया आधार जक खः ।'
