भाय् संरक्षणया निंतिं नेवाः युवा परिचालन यायेमाः - मिस नेवाः सुजिना

थुगुसीया मिस नेवाः २०१० जाउलाख्यःया झिंगुदँया सुजिना शाक्य जुयादीगु खः । नेपिलज फेसन होमया ग्वसालय् पुष १५ गते येँया नेपाल प्रज्ञा प्रतिष्ठान जूगु ज्याझ्वलय् व्हाइट हाउस कलेजय् ब्वनाच्वंम्ह शाक्य मिस नेवाः घोषित जूगु खः । मिस नेवाः २०१० घोषणा लिपा शाक्यनाप नेपालमण्डलंया खँल्हाबल्हा न्ह्यब्वयाच्वना ।

छि मिस नेवाः जुयादिल, थुकिया श्रय सुयात बियादी, छाय्?
- जि मिस नेवाः जुयागुया श्रय जिगु जीवनया दकले मध्ये तःधंम्ह प्रेरणा जिमि मांयात बिइ । वयां लिपा ग्वसाःखलः नेप्लिज फेशन होम, जिमित भाषा कोरियोग्राफि व डान्स कोरियोग्राफि स्यनादीपिं गुरु, जिगु परिवार, पासापिं व जित थ्व थासय् तक थ्यंकेत हौसला बियादीपिं सकल शुभचिन्तकतय्त बियाच्वना । छाय्धाःसा वय्कःपिनिगु ग्वाहालि व विश्वासं जि थौं थ्व थासय् तक थ्यनेत सफल जूगु खः ।

छिं थःगु छ्यने मिस नेवाः २०१० या ताज तयेकेवं गज्यागु महसुस यानादिया?
- जिगु छ्यने मिस नेवाः २०१० या ताज तयेकाबिइवं जि तसकं लय्ताया, अले तसकं गर्वया महसुस याना । मिस नेवाः २०१० धकाः जिगु नां घोषणा जूबले न्हापाला जिं म्हगस खंगु थें जुल । ताजया नापनापं वःगु जिम्मेवारीया नं बोध जुल ।

मिस नेवाः २०१० या घोषणा नापं छिगू नां कायेवं दकले न्हापां सुयात लुमंकादिया ?
- मिस नेवाः २०१० या घोषणा नापं जिगु नां कायेवं जिमि मांयात लुमंका अले म्हुतुं पिहाँवल यः मां……

मिस नेवाः जुइधुंकाः नेवाः समाजया निंतिं वइगु दिनय् छिं छु यायेगु बिचाः दु?
- नेवाः भाय् व तजिलजिया संरक्षण व संवद्र्धनया निंतिं दकले न्हापा नेवाः युवा परिचालन यायेमाःगु जिं खना । नापं झी युवातय्के थःगु समुदायप्रति थःगु दायित्व बोध याकेमाःगु थौंया आवश्यकता खः । अथेजूगुलिं जि छम्ह नेवाः समुदायया नेवाः युवा व नेवाः म्ह्याय्मचाया प्रतिनिधित्व याना आम संचार जागरण ज्याझ्वः आदि थीथी माध्यमं चेतना ब्वलंकेगु ज्या यायेगु बिचाः दु । अथेहे नेपालभाषा आकादेमिया संरक्षण व सम्वद्र्धन यायेत नेवाः युवातय्त परिचालन व इनाप यायेगु बिचाः दु ।

लच्छिया प्रशिक्षणं छिं छु खँ सयेकादिया उकियात गुलितक ब्यवहारय् छ्यलादी?
- लच्छिया प्रशिक्षणं जिं थःगु धाथेंया पहिचान व म्हसिका छु खः धकाः थुइका कयागु दु । थ्व आत्मबोधया नापं जिके थःगु समुदाय व संस्कृति प्रतिया दायित्व नं बोध जूगु दु । थुकिया फल स्वरुप जिं थःगु मौलिक भाय् नेवाः भाय्या महत्व बुझेजुया गबलें नं औपचारिक रुपय् नेपालभाषा मछ्यलाम्ह जिं मिस नेवाःज्याझ्वःया निंतिं धाःसा मुक्कं जिं नेवाः भाय् जक ल्हाना छ्यला । उकिं जुइमा मिस नेपालभाषाया उपाधि त्याकेत नं जि सफल जुल । थ्व जिगु निंतिं तःधंगु उपलब्धि जुयाबिल । व हे उपलब्धिं जिके बिकास जूगु भाषा व संस्कृतिप्रतिया अस्तित्व व दायित्व बोधयात मूर्त रुप बिइत वइगु दिनय् ब्यवहारय् हया सम्वद्धन व प्रचार प्रसारयाना नेवाः युवातय्त सचेत व परिचालन यायेगु सोच दु ।

दकले लिपा मिस नेवाः ज्याझ्वःया दकले लिपांगु चरण टप ७ य् न्यंगू न्ह्यसः -
छिगू बिचारय् मिसा व मिजंयात समान अधिकार बिइमा कि लेडिज फस्टया मान्यता तया मिस्तय्त आरक्षण बिइमा ?
- जिगु बिचारय् मिसा व मिजंयात समान अधिकार बिइमाः । लेजिड फस्ट धैगु मान्यतायात झीसं चीकाः यंके फयेकेमाः । छाय्धाःसा थज्यागु मानसिकतां झी मिस्तय्त झन कमजोर यानाबिइ । मिसा व मिजं धैगु मानसिक शारिरीक व आत्मिक तवरं समान जूपिं प्रकृतिया स्वरुप खः । व झीसं छुं अवसर बिइबले इमिगु प्रतिभा व क्षमता अनुरुप बिइमाः । मिसा मिजं धकाः भेदभाव याना अवसर बिइमज्यू । झी मिस्तय्त अधिकार माः आरक्षण मखु ।

(किपा : नरेश श्रेष्ठ)

More Stories Like this